पेरिस सेन्ट जर्मेन पीएसजीले लिग वानमा सफलता हासिल गरेको छ । शनिबार राति बराबरीतर्फ उन्मुख खेलमा ईकार्डीले गोल गरेपछि ब्रेस्टलाई २–१ गोल अन्तरले पीएसजीले हराएको छ ।खेलको ३९ औ मिनेटमा एन्जल डी मारियाले गोल गर्दै पीएसजीलाई अग्रता दिलाएका थिए ।ग्रान्डसिरले ७२ औ मिनेटमा ब्रेस्टका लागि बराबरी गोल फर्काएका थिए ।
ईकार्डीले ८५ औ मिनेटमा गोल गर्दै पीएसजीलाई जित दिलाउन सफल रहे । बैकल्पिक खेलाडीको रुपमा मैदान छिरेका उनी पाँचौ मिनेटमा गोल गर्न सफल रहेका थिए । अर्जेन्टिनी स्टार पछिल्ला १० खेलमा ९ गोल गर्न सफल रहेका छन् । उनी लोनमा ईन्टर मिलानबाट यसै सिजन पीएसजी आएका हुन् ।
ईकार्डीको गोलसंगै पीएसजी जितको यात्रामा फर्किएको छ । साविक विजेता पीएसजीले १३ खेलमा १० जित निकाल्न सफल भएको छ । उसले दोस्रो स्थानको एन्गर्ससंग ९ अंकको अग्रता लिएको छ । शीर्ष स्थानको पीएसजीको ३० अंक छ । ब्रेस्ट १७ अंक सहित तालिकाको दशौं स्थानमा छ ।
