काठमाडौं । कोशी प्रदेशकै सबैभन्दा ठूलो अस्पतालका रूपमा रहेको कोशी अस्पतालमा बिरामीको चाप बढेसँगै दैनिक रगत अभाव हुन थालेपछि अस्पतालले आफ्नै ‘ब्लड बैंक’ स्थापना गर्ने तयारी थालेको छ।
प्रादेशिक रक्तसञ्चार सेवा विराटनगरका अनुसार कोशी प्रदेशमा दैनिक करिब ९०० देखि १००० युनिटसम्म रगतको माग हुने गरेको छ। आकस्मिक अवस्थाका बिरामीलाई समयमै रगत उपलब्ध गराउन अस्पतालले आफ्नै संरचनामा ‘ब्लड बैंक’ स्थापना गर्न लागेको अस्पतालका प्रशासन प्रमुख त्रिलोचन न्यौपानेले जानकारी दिए।
अस्पतालमा रगत अभावका कारण आकस्मिक सेवाका बिरामी तथा तिनका आफन्तले सास्ती खेप्दै आएका छन्। विशेषगरी प्रसूति र शल्यक्रियाका बिरामीका लागि समयमै रगत जुटाउन कठिन हुने गरेको छ।
अस्पतालले ‘ब्लड बैंक’ सञ्चालनका लागि आवश्यक सामग्री खरिद गर्न गत पुस महिनामै बोलपत्र आह्वान गरी प्रक्रिया सुरु गरेको थियो। सोहीअनुसार आवश्यक पूर्वाधार निर्माण, उपकरण जडान तथा सेवा सञ्चालनको व्यवस्था गरिने जनाइएको छ।
करिब २४ लाख रुपैयाँको लागतमा निर्माण गरिने उक्त ‘ब्लड बैंक’ स्थापना भएपछि रगत सङ्कलन, परीक्षण र भण्डारण प्रक्रिया छिटो हुने अपेक्षा गरिएको छ।
“अहिले हामी बाह्य निकायमा निर्भर छौँ, जसका कारण कतिपय अवस्थामा रगत अभाव हुन्छ,” प्रशासन प्रमुख न्यौपानेले भने, “अस्पतालमै ब्लड बैंक सञ्चालनमा आएपछि बिरामीलाई छिटो र सहज रूपमा सेवा दिन सकिन्छ।”
ब्लड बैंक सञ्चालनका लागि आवश्यक कर्मचारीका दरबन्दीसमेत खुलाइसकिएको र छनोट प्रक्रिया अघि बढिरहेको जनाइएको छ। कोशी अस्पतालमा टाढाका जिल्ला तथा छिमेकी भारतीय सहरबाट समेत बिरामी उपचारका लागि आउने भएकाले रगतको आवश्यकता उच्च रहेको चिकित्सकहरू बताउँछन्।
अस्पतालका स्त्री तथा प्रसूति रोग विभाग प्रमुख डा. अन्जु देवका अनुसार प्रसूति र शल्यक्रिया सेवा अत्यन्तै संवेदनशील तथा आकस्मिक हुने भएकाले रगत अभाव हुँदा सेवा प्रवाहमा ठूलो समस्या पर्ने गरेको छ। “कतिपय अवस्थामा बिरामी भर्ना गर्नुअघि नै आफन्तलाई रगतको व्यवस्था गर्न लगाउनुपर्ने बाध्यता छ,” उनले भने ।
हाल अस्पताल रेडक्रसजस्ता बाह्य निकायमा निर्भर रहनुपर्ने अवस्था रहेको र कहिलेकाहीँ निजी अस्पतालले आफ्ना बिरामीलाई प्राथमिकता दिँदा गरिब बिरामीहरू प्रभावित हुने गरेको उनको भनाइ छ।
अस्पतालमै ‘ब्लड बैंक’ सञ्चालनमा आएपछि बिरामीले आफैँ रगत खोज्नुपर्ने बाध्यताबाट राहत मिल्ने विश्वास गरिएको छ। पछिल्लो समय नियमित रक्तदान कार्यक्रमहरू पनि ओझेलमा परेकाले रगत आपूर्तिमा थप चुनौती देखिएको छ।
