अन्तर्राष्ट्रिय क्रिकेट परिषद् (आइसिसी) ले पुरुष टी–ट्वेन्टी विश्वकपमा सहभागी टोलीहरूको संख्या बढाउने तयारी गरेको छ । आइसिसीले टी–ट्वेन्टी विश्वकपमा हालको १६ बाट बढाएर २० टोली सहभागी गराउने तयारी गरिरहेको टेलिग्राफ स्पोर्टसले जनाएको छ । खेलको दायरा बढाउनका लागि टी–ट्वेन्टी स्वरूपलाई सर्वश्रेष्ठ मान्दै आएको आइसिसीले विश्व कपको आगामी संस्करणमा ४ देशलाई सहभागी गराएर २० पुर्याउने तयारी गरेको हो ।
सन् २०२३ देखि ३१ सम्मको अन्तर्राष्ट्रिय क्रिकेट क्यालेन्डरमाथि विस्तृत छलफलपछि आइसिसी सहभागी टोलीको संख्या बढाउने तयारीमा जुटेको छ । टी–ट्वेन्टी विश्वकप २०२४ मा हुनेछ । आइसिसीले २० राष्ट्रलाई विश्वकपमा समावेश गर्नका लागि २ वटा विकल्प सोचेको छ । विश्व कप छनोट खेलेर आउने टिमले लिग चरणमा ठूला ठूला राष्ट्रसँग खेल्ने र आइसिसीले ४ समूह बनाएर ५ राष्ट्रलाई विभाजन गर्ने तथा हरेक समूहबाट शीर्ष स्थानमा रहने राष्ट्रले नकआउट चरणमा स्थान बनाउने विकल्पमाथि आइसिसीले विचार गरिरहेको हो । आईसिसीले प्रत्येक वर्ष एउटा विश्वव्यापी प्रतियोगिता आयोजनाको प्रस्ताव राखेको छ ।
यो प्रस्ताव पारित भए एसोसिएट र क्रिकेटको क्रेज भएका देशका लागि फाइदा पुग्ने अनुमान गरिएको छ । जसमा क्यानडा, जर्मनी, नाइजेरियासँगै नेपालले पनि खेल्ने अवसर प्राप्त गर्ने सम्भावना रहेको छ । विश्वकपमा टोलीहरू बढाइएसँगै दर्शकको संख्यामा वृद्धि हुने अपेक्षासहित विश्वव्यापी प्रतियोगितामा अमेरिकी प्रतिनिधित्वको सम्भावना बढ्ने आईसिसीको ठहर छ । आइसिसीले अमेरिकालाई ठूलो बजारको रूपमा हेर्दै आएको छ । अमेरिकामा खेललाई बढावा दिन आइसिसीले हाल सबै प्रयास गरेको छ ।
