काठमाडौँ। खराब प्रदर्शन गरेको नेपालले जापानमा भएको २० औँ एसियाली खेलकुदको महिला भलिबलमा हारबाट शुरुवात गरेको छ ।
नागोया सहरस्थित कोमाकी पार्क एरिनामा बुधवार भएको पहिलो खेलमै नेपाली महिला टोली जापानसँग सोझो सेटमा हार व्यहोरेको छ ।
एशियाको शिर्ष स्थानमा रहेको जापानसँग नेपालले बिर्सनलायक प्रदर्शन गर्यो । नेपालको समूह ए मा जापान र इण्डोनेसिया छ । यो हारसँगै दोस्रो चरणमा पुग्न नेपालले इण्डोनेसियासँगको खेल जित्नै पर्ने दबाब बढेको छ ।
नेपालले अब दोस्रो खेल इण्डोनेसियासँग बिहीवार खेल्नेछ । उक्त खेल जितेमा नेपाल क्वाटरफाईनल पुग्नेछ । पराजित भएमा नेपालले नवौंदेखि १४ औं स्थानसम्म क्वालिफिकेसन म्याच खेल्नुपर्नेछ ।
एफआइभीबी वरियतामा नेपाल ६९ औं स्थानमा छ भने इण्डोनेसिया ५३ औं स्थानमा छन् । जापान भने एशियाको शिर्ष वरीयताको टोली हो । नेपाल जापानसँग २५–८, २५–१२ र २५–११ ले पराजित भयो ।
कुल १४ राष्ट्र सहभागी भएको महिला भलिबलमा चार समूह छन् । समूहको शिर्ष दुई टोलीले क्वार्टरफाइनलमा स्थान बनाउनेछ ।
एफआइभिबी विश्व वरियतामा भने जापान छैटौं स्थानमा छ । जापानमा शुरु भएको २० औं एसियाली खेलकुदअन्तर्गत नेपालको यो पहिलो प्रतिष्पर्धा पनि हो । –न्युज एजेन्सी नेपाल
