काठमाडाैँ । नेपाली कांग्रेसका सचेतक निश्कल राईले विपद् व्यवस्थापनका लागि स्पष्ट कार्यादेश (टीओआर) सहित संसदीय समिति गठन गर्न सरकारसँग माग गर्नुभएको छ।
बुधबार संसद् भवनबाहिर सञ्चारकर्मीसँग कुरा गर्दै सचेतक राईले विपद् व्यवस्थापनमा सबै राजनीतिक दललाई सहभागी गराउन संसदीय समिति गठन गर्नुपर्ने बताउनुभएको हो। उहाँले सत्तारुढ दलका सभापतिलाई समेत संसदीय समिति गठन गरी विपद् व्यवस्थापनको काममा सबै दललाई सहभागी गराउन आग्रह गरिएको जानकारी दिनुभयो।
विपद् कुनै पक्ष वा प्रतिपक्षको विषय नभई साझा विषय भएकाले कांग्रेस सरकारलाई सर्तरहित रूपमा सहयोग गर्न तयार रहेको उहाँले बताउनुभयो। तर त्यसका लागि सरकारको तदारुकता र प्रभावकारी समन्वय आवश्यक रहेको उहाँको भनाइ छ।
सचेतक राईले उच्चस्तरीय राजनीतिक संयन्त्रको बैठकमा प्रधानमन्त्रीको प्रत्यक्ष सहभागिता नदेखिएकोप्रति समेत प्रश्न उठाउनुभयो। उहाँका अनुसार बुधबार बसेको बैठकमा सत्तारुढ दलका सभापति, प्रमुख प्रतिपक्ष दलका सभापति तथा पूर्वप्रधानमन्त्रीहरू सहभागी भए पनि प्रधानमन्त्रीको उपस्थिति थिएन।
‘विपद्को बेला सबै पक्षलाई विश्वासमा लिएर अघि बढ्नुपर्छ। सरकारबाटै यस्ता पहल र प्रधानमन्त्रीको उपस्थिति भएको भए काम अघि बढाउन अझ सहज हुन्थ्यो,’ राईले भन्नुभयो।
उहाँले विपद्पछि खोज तथा उद्धारसँगै पुनःस्थापना र पुनर्निर्माणको कामलाई योजनाबद्ध ढंगले अघि बढाउनुपर्नेमा जोड दिनुभयो। रसुवालगायत प्रभावित क्षेत्रमा देखिएका कमीकमजोरी सुधार गर्दै पुनर्निर्माणका लागि स्पष्ट योजना बनाउनुपर्ने उहाँको भनाइ छ।
