काठमाडौ । नेकपा एमालेको ११ औँ महाधिवेशन २७ मङ्सिर सुरु हुदैछ । नेतृत्वको आकाक्षी धेरै भएपछि एमालेले पदाधिकारीको संख्या फेरि बढाउने तयारी गरेको छ । आज बस्ने सचिवालय बैठकले पदाधिकारीको संख्या बढाउने निर्णय हुने एक सदस्यले जानकारी दिनुभयो ।बैठक आज दिउँसो १ बजे पार्टी कार्यालय च्यासलमा बस्दैछ । बैठकले एकसय ८ जनालाई महाधिवेशन प्रतिनिधिमा मनोनित गर्ने तयारी समेत गरेको छ ।
अध्यक्ष केपी शर्मा ओलीओलीले बिहिबार सम्पादकहरुसंगको छलफलमा भन्नुभयो ‘यो बिषय शुक्रबार बस्ने सचिवालयको अन्तिम बैठकले यो कुराको तय लाग्छ । शुक्रबार सम्म कुर्नुपर्छ ।’
अध्यक्ष ओलीले चलाखीपूर्ण निर्णय गर्दै पदाधिकारीको संख्या बढाउने तयारी गर्नुभएको छ । अहिले १९ जना पदाधिकारी रहँदै आएकोमा एमालेमा आगामी महाधिवेशनपछि त्यसलाई घटाएर १५ जनामा सीमित गर्ने प्रस्ताव यसअघि नै पारित भइसकेको थियो । तर अझै एक कार्यकाल नेतृत्व गर्ने तयारीमा रहेका ओलीले आफ्नो पक्षलाई बलियो बनाउन र नेताहरुलाई भागबन्डा पुर्याउन पदाधिकारी थप्न खोजेका हुन् ।
एमालेको गत भदौमा भएको विधान महाधिवेशनले पार्टी पदाधिकारी १५ सदस्यीय र केन्द्रीय कमिटी २ सय ५१ सदस्यीय बनाउने निर्णय गरेको थियो । तर अहिले पार्टीबाट विगतमा अलग भएर गएकाहरु फर्किएको र नेताहरुको व्यवस्थापन गर्न पदाधिकारीको संख्या बढाएर पुनस् १९ जना नै बनाउने तयारी भएको हो ।
यो पनि पढ्नुहोस- एमालेमा ओलीको अर्को अस्त्र, पदाधिकारीको संख्या फेरि बढाउने !
विधानको धारा १६ (२) मा तीन सय एकको केन्द्रीय कमिटीलाई संशोधन गर्दै १५ सदस्यीय पदाधिकारीसहित र्२ सय ५१ को केन्द्रीय कमिटी हुने व्यवथा गरिएको थियो । त्यसैगरी वरिष्ठ उपाध्यक्षको व्यवस्थापन पनि हटाइएको थियो । उपाध्यक्षको संख्या तीनमा झारिएको थियो । तर अब वरिष्ठ उपाध्यक्ष, पाँच जना उपाध्यक्ष र ७ सचिव नै राख्ने तयारी छ ।
स्थायी कमिटी र पोलिटब्यूरो सदस्यको सङ्ख्या पनि पनि बढाइने भएको छ । यसअघि ४५ सदस्यीय स्थायी कमिटीलाई घटाएर पार्टीका १५ जना पदाधिकारीलाई मात्र स्थायी कमिटीका रूपमा राख्ने निर्णय भएको थियो । यस्तै ९९ सदस्यीय पोलिटब्यूरोको सङ्ख्या घटाएर बढीमा एकतिहाइ रहने व्यवस्था गरिएको थियो ।
मंसिर २७ गतेदेखि २९ गतेसम्म काठमाडौंमा हुने एमालेको ११औं महाधिवेशनमा अध्यक्ष ओलीले आफू निकटहरुलाई पद बाँड्न पनि पदाधिकारीको संख्या थप गर्न लागेका हुन् ।
उपाध्यक्ष अष्टलक्ष्मी शाक्यले पदाधिकारीको सख्या थप गर्ने निर्णय स्वीकार नहुने बताउनु भयो उहाँले न्यूजपोलारसंग भन्नुभयो ‘बहुमत छ भन्दैमा बिधान मिच्न पाईदैन । उहाँले भन्नुभयो ‘हिजो नहटाऔ भन्दा अध्यक्ष ओलीले नै हठात रुपमा हटाउनु भयो , आज आफुलाई अप्ठारो पर्दा फेरी व्यूताउने कार्य स्वीकार हुन सक्दैन ।”
