काठमाडौं । पूर्व राष्ट्रपति विद्यादेवी भण्डारीले पीडामा साथ दिने र सकेको सहयोग गर्ने संस्कारलाई पनि हाम्रो पर्वको अभिन्न हिस्सा बनाउन आग्रह गर्नुभएको छ । हरितालिका (तीज), को अबसरमा शुभकामना व्यक्त गर्दे पूर्व राष्ट्रपति भण्डारीले यस्तो आग्रह गर्नुभएको हो ।
उहाँले तीजले महिलामाथि हुने सबै प्रकारका विभेद, हिंसा र असमानताको अन्त्य गर्दै सम्मान, समानता र अवसरमा आधारित सभ्य तथा न्यायपूर्ण समाज निर्माणका लागि हामी सबैलाई प्रेरणा प्रदान गरोस् भन्ने कामना गर्नुभएको छ ।
सन्देशमा भनिएको छ- तीज हाम्रो मौलिक सांस्कृतिक परम्परा र चेली–माइतीको आत्मीय सम्बन्धलाई जोड्ने महत्वपूर्ण पर्व हो । यसले परिवार, आफन्त र समाजमा प्रेम, सद्भाव र एकताको भावना अझ बलियो बनाउन योगदान पुर्याउँदै आएको छ ।
सन्देशमा भनिएको छ -यस वर्ष मुलुक प्राकृतिक विपद्का कारण पीडामा रहेको अवस्थामा हामी तीज मनाउँदैछौँ । भोटेकोशी–त्रिशूली बाढीबाट प्रभावित परिवार तथा समुदायप्रति ऐक्यबद्धता प्रकट गर्दै यसपटकको तीजलाई संयमित र मितव्ययी रूपमा मनाऔँ । आफ्नो खुसीसँगै दु:खमा रहेका दाजुभाइ तथा दिदीबहिनीको पीडामा साथ दिने र सकेको सहयोग गर्ने संस्कारलाई पनि हाम्रो पर्वको अभिन्न हिस्सा बनाऔँ ।
