काठमाडौं । महाधिवेशन नजिकिँदै गर्दा नेकपा एमालेले पदाधिकारीको संख्या फेरि बढाउने तयारी गरेको छ । अध्यक्ष केपी शर्मा ओलीले चलाखीपूर्ण निर्णय गर्दै पदाधिकारीको संख्या बढाउने तयारी गरेका हुन् । जबकी अहिले १९ जना पदाधिकारी रहँदै आएकोमा एमालेमा आगामी महाधिवेशनपछि त्यसलाई घटाएर १५ जनामा सीमित गर्ने प्रस्ताव यसअघि नै पारित भइसकेको थियो । तर अझै एक कार्यकाल नेतृत्व गर्ने तयारीमा रहेका ओलीले आफ्नो पक्षलाई बलियो बनाउन र नेताहरुलाई भागबन्डा पुर्याउन पदाधिकारी थप्न खोजेका हुन् ।
एमालेको गत भदौमा भएको विधान महाधिवेशनले पार्टी पदाधिकारी १५ सदस्यीय र केन्द्रीय कमिटी २ सय ५१ सदस्यीय बनाउने निर्णय गरेको थियो । तर अहिले पार्टीबाट विगतमा अलग भएर गएकाहरु फर्किएको र नेताहरुको व्यवस्थापन गर्न पदाधिकारीको संख्या बढाएर पुन: १९ जना नै बनाउने तयारी भएको हो ।
विधानको धारा १६ (२) मा तीन सय एकको केन्द्रीय कमिटीलाई संशोधन गर्दै १५ सदस्यीय पदाधिकारीसहित र्२ सय ५१ को केन्द्रीय कमिटी हुने व्यवथा गरिएको थियो । त्यसैगरी वरिष्ठ उपाध्यक्षको व्यवस्थापन पनि हटाइएको थियो । उपाध्यक्षको संख्या तीनमा झारिएको थियो । तर अब वरिष्ठ उपाध्यक्ष, पाँच जना उपाध्यक्ष र ७ सचिव नै राख्ने तयारी छ ।
स्थायी कमिटी र पोलिटब्यूरो सदस्यको सङ्ख्या पनि पनि बढाइने भएको छ । यसअघि ४५ सदस्यीय स्थायी कमिटीलाई घटाएर पार्टीका १५ जना पदाधिकारीलाई मात्र स्थायी कमिटीका रूपमा राख्ने निर्णय भएको थियो । यस्तै ९९ सदस्यीय पोलिटब्यूरोको सङ्ख्या घटाएर बढीमा एकतिहाइ रहने व्यवस्था गरिएको थियो । यी पदका विषयमा पनि महाधिवेशनमा पुन छलफल गरी टुंगो लगाउने तयारी छ ।
मंसिर २७ गतेदेखि २९ गतेसम्म काठमाडौंमा हुने एमालेको ११औं महाधिवेशनमा अध्यक्ष ओलीले आफू निकटहरुलाई पद बाँड्न पनि पदाधिकारीको संख्या थप गर्न लागेका हुन् । महाधिवेशनमा आफ्नो विपक्षीमा उभिनेहरुलाई तह लगाउन र आफू निकटलाई जिम्मेवारी दिने गरी उनले तयारी थालेका हुन् ।
ओलीले आफू र पार्टीलाई संकट परेका बेला साथ दिनेहरुलाई पद बाँड्ने तयारी गरेका छन् । तर यसबारे ठोस निर्णय भने भइसकेको छैन ।
११ औं महाधिवेशनमा वरिष्ठ उपाध्यक्ष ईश्वर पोखरेलले अध्यक्षमा उम्मेदवारी जानकारी सचिवालय बैठकमा दिइसकेका छन् । उनले ओलीलाई चुनौती दिने गरी उम्मेदवारी दिने बताइएको छ ।
वरिष्ठ उपाध्यक्ष पोखरेलले आफूलाई चुनौती दिने भएपछि ओली पनि झस्किएका छन् । अहिलेसम्म पोखरेलले ओलीलाई सहयोग गर्दै आएका थिए । तर ओलीविरुद्ध नै पोखरेलले उम्मेदवारी दिने भएपछि एमालेमा नयाँ बहससमेत ल्याएको छ ।
आगामी कार्यकालका लागि आफू सर्वसम्मत अध्यक्ष बन्ने ओलीको चाहना छ । तर त्यो सम्भावना नदेखिएपछि उनले नेता व्यवस्थापन गर्न र आफ्ना विरोधीहरुलाई ठीक ठाउँमा ल्याउन पदाधिकारीमै थप पदको व्यवस्था गर्न लागेका हुन् । यसले एमालेभित्र फेरि अर्को नयाँ बहसको सुरुवात भएको छ ।
११औं महाधिवेशनका लागि एक दर्जन समिति गठन
यसैबीच एमालेले ११औं महाधिवेशनका लागि विभिन्न समिति गठन गरेको छ ।
सचिवालयको बिहीबारको बैठकले प्रतिनिधि व्यवस्थापनका लागि संगठन विभाग प्रमुख काशीनाथ अधिकारी संयोजक र सोही विभागका सचिव माधव ढुंगेल सदस्य–सचिव रहेको प्रतिनिधि व्यवस्थापन समिति, उपमहासचिव प्रदीप ज्ञवाली संयोजक र बागमती प्रदेश इन्चार्ज राजन भट्टराई सचिव रहेको जनपरिचालन समिति गठन गरेको छ ।
त्यस्तै सचिव छबिलाल विश्वकर्मा संयोजक तथा लालबाबु पण्डित सचिव रहेको आवास व्यवस्थापन समिति, सचिव लेखराज भट्ट संयोजक र भीम अधिकारी सचिव रहेको खाद्य व्यवस्थापन समिति, सचिव गोकर्ण विष्ट संयोजक तथा रचना खड्का सचिव रहेको यातायात व्यवस्थापन समिति, सचिव रघुवीर महासेठ संयोजक र महेश बस्नेत सचिव रहेको अतिथि सत्कार समिति बनाएको छ ।
सचिव पद्मा अर्याल संयोजक तथा राजेन्द्र गौतम सचिव रहेको प्रचारप्रसार समिति, भानुभक्त ढकाल संयोजक र विनोद पाण्डे सचिव रहेको स्वयंसेवक परिचालन समिति, विनोद श्रेष्ठ संयोजक तथा लोकबहादुर भण्डारी सचिव रहेको मञ्च व्यवस्थापन समिति, कृष्णगोपाल श्रेष्ठ संयोजक र राष्ट्रिय स्वास्थ्यकर्मी महासंघका अध्यक्ष सचिव रहेको स्वास्थ्य समिति, विष्णु रिमाल संयोजक तथा विनोद श्रेष्ठ सचिव रहेको आर्थिक समिति, महासचिव शंकर पोखरेल संयोजक, उपमहासचिव पृथ्वीसुब्बा गुरुङ सचिव र योगेश भट्टराई सदस्य रहेको सचिवालय समिति बनाएको छ ।
निर्वाचन आयोगका अध्यक्ष विजय सुब्बा संयोजक रहेको निर्वाचन संयोजन समिति गठन गर्ने निर्णय भएको एमालेले जनाएको छ ।
