काठमााडौँ । सकारले भोलिदेखि पसल व्यवसाय सञ्चालन गर्न दिने भएको छ । मन्त्रिपरिषदको आज साँझ बसेको बैठकले सो निर्णय गरेको हो । मन्त्रिपरिषद्को बुधबार राति सम्पन्न बैठकले सबै किसिमका पसलहरु सुरक्षा मापदण्ड अपनाएर सञ्चालन गर्न दिने निर्णय गरेको हो ।
यसैगरी मन्त्रिपरिषदले निजी सवारीसाधन पनि सञ्चालन गर्न दिने भएको छ । निजी सवारी साधनलाई जोरबिजोरका आधारमा सञ्चालन गर्न दिने निर्णय पनि भएको बताइएको छ । यो निर्णय भोलिदेखि नै लागू हुने बताइएको छ। जोर गते जोर नम्बरका निजी सवारी साधन र बिजोर गने बिजोर नम्बरका सवारी सञ्चालन गर्न पाइने छ । तर सार्वजनिक यातायात भने तत्कालका लागि सञ्चालन गर्न पाइने छैन ।
सरकारले साढे दुई महिनाअघि गत चैत ११ गतेदेखि लकडाउन गरेको थियो । यसको चौतर्फी असर परेपछि सरकारमाथि लकडाउन खुकुलो बनाउन दवाव बढ्दै आएको थियो । सोही अनुसार सरकारले लकडाउन खुकुलो बनाउने गरी निर्णय गरेको हो । यसबीचमा व्यवसायी, विज्ञलगायतले कोरोना महामारी तत्कालै हट्ने नदेखिएपछि लकडाउनको मोडालिटी परिवर्तन गर्न माग गर्दै आएका थिए । सबैतिरको चौतर्फी मागको आधारमा सरकारको यो निर्णय आएको हो ।
यसैगरी रोकिएको एसइइको परीक्षा पनि नलिने र कानुन बनाएर विद्यालयले आन्तरिक मूल्यांकनका आधारमा नम्बर दिएर नतिजा प्रकाशन गर्ने निर्णय पनि मन्त्रिपरिषदले गरेको बताइएको छ ।
