काठमाडौँ । पूर्वाधार विकास समितिका सभापति दीपकबहादुर सिंहले जलस्रोत विधेयक अबको दुई हप्ताभित्रमा सदनमा पेश गर्ने बताउनुभएको छ ।
बिहीवार काठमाडौंमा आयोजित ‘नेपालमा प्रभावकारी सुशासनका लागि एकीकृत नदी वेसिन योजना र व्यवस्थापन’ विषयक कार्यशालामा बोल्दै सभापति सिंहले यस्तो बताउनुभएको हो ।
उहाँले विधेयकमा मोटामोटी सहमति भइसकेपनि केही कुरामा सहमति जुटाउन बाँकी रहेको उल्लेख गर्दै अबको दुई हप्ताभित्र सदनमा पेश गर्ने बताउनु भयो । उहाँले उर्जा विधेयकलाई समेत शेयरधनी नेपालीको हक र हित हुनेगरी ल्याउने प्रतिवद्धता व्यक्त गर्नुभयो । उहाँले अहिलेका शासकहरुले पानीको महत्व नबुझेको कारण मानवनिर्मित तालतलैयाहरु सुक्दै गएको बताउनु भयो । मानव निर्मित तालहरुको पानी सुख्खायाममा जहाँपनि प्रयोग गर्दा सजिलो हुने भएपनि त्यसतर्फ सरकारले ध्यान नदिएको उहाँको भनाइ छ ।
उहाँले भन्नुभयो, ‘जलस्रोत विधेयक र उर्जा विधेयक पूर्वाधार विकास समितिमा आएको छ । पहिला उर्जा विधेयक आयो त्यसपछि जलस्रोत विधेयक आयो । जलस्रोत विधेयकमा हामी दुईचार वटा कुराहरुमा हामी अड्किएका छौं । तर केही समयमा हामी आपसमा छलफल गरेर सबैको सल्लाह सुझावलाई लिएर छिटोभन्दा छिटो अगाडि बढाउन गइराखेका छौं । सदनमो पेस गर्न गइरहेका छौं । त्यो विधेयक हामीले यस्तो बनाउनुपर्छ जुन विधेयक राष्ट्रहित होस् । जुन विधेयक जनहित होस् । यस विधेयकले शेयर लिएका नेपाली जनताको हक र हितमा होस् भन्ने कारणले र सेक्टरमा भएका साथिहरु र विज्ञहरुसँग पनि गहिरो डिसकसन गरेपछि मात्र हामी अगाडि बढ्नको लागि तयार हुन्छौं । अब जलस्रोत विधेयक सदनमा पेस गर्न दुई हप्ता पनि लाग्दैन । अहिलेका शासकहरुले पानीको महत्व बुझेका छैनन् । उपत्यकामा पनि मान्छेबाट निर्मित ताल तलैयाहरु सयौं हजारौंको संख्यामा थियो । मान्छेले त्यो निर्मित गर्दाखेरि मान्छेले रोजगारी पाउँथ्यो । त्यो पानी ड्राइ सिजनको बेला जहाँ पनि प्रयोग गर्न सकिन्थ्यो । तर त्यो सबै विनाश भएर गयो ।’
सभापति सिंहले जंगल मासिँदै गएपनि पानीका स्रोतहरु समेत सुक्दै गएको कारण वन जंगलको संरक्षणमा सबैले जिम्मेवार हुन आवश्यक रहेको बताउनु भयो ।
