काठमाडौँ ।आइसीसी यू–१९ टी–२० महिला विश्वकप क्रिकेट प्रतियोगिताअन्तर्गत बङ्गलादेशविरूद्धको खेलमा नेपाल ५२ रनमै अलआउट भएको छ ।
नेपालले बंगलादेशलाई ५३ रनको लक्ष्य दिएको छ । मलेसियाको बांगीमा टस हारेर पहिला ब्याटिङमा उत्रिएको नेपाल १८.२ ओभरमा ५२ रनमा अलआउट भयो ।
नेपालका लागि साना प्रविनले सर्वाधिक १९ रन जोडिन् । यस्तै, सिमाना केसीले १०, रिया शर्माले ५, एलिशा यादवले ४, तिर्सना विश्वकर्मा र रचना चौधरीले ३–३ रन जोडे ।
बलिङतर्फ बंगलादेशकी जन्नतुल मोउआले दुई तथा निशिता अक्तर निशि, फहोमिदा चोया र अनिसा अक्तर सोवाले एक–एक विकेट लिइन् । नेपालका ५ खेलाडी रनआउट भएका थिए ।
नेपालको समूहमा स्कटल्यान्ड, बङ्गलादेश र अस्ट्रेलिया छन् । नेपालले दोस्रो खेल माघ ७ गते स्कटल्यान्डसँग खेल्नछ भने तेस्रो खेल माघ ९ गते अस्ट्रेलियासँग खेल्नेछ ।
