म्याड्रिडः उरुग्वेका स्ट्राइकर लुइस सुवारेजले अन्ततः बार्सिलोना छाडेका छन् । उनी करिब ७० लाख डलरमा स्पेनकै अर्को क्लब एट्लेटिको म्याड्रिडमा अनुबन्धित भएका छन् ।
बार्सिलोनामा रहँदा ३३ वर्षीय सुवारेजले १३ वटा प्रतिस्पर्धामा जित दिलाउन महत्वपूर्ण भूमिका खेलेका थिए । उनले क्लबका लागि १९८ गोल गरेका थिए । बार्सिलोनाका लागि लियोनेल मेस्सीले ६३४ र सेजार रोड्रिगेजले २३२ गोल गरेका छन् ।
बार्सिलोनाका नयाँ प्रशिक्षक रोनाल्ड कोमानले सुवारेजलाई क्लब छाड्न अनुरोध गरेका थिए । गत च्याम्पियन्स लिगमा जर्मनीको बायर्न म्युनिखसँग ८–२ गोल अन्तरले पराजित भएपछि बार्सिलोनालाई नयाँ स्वरुपमा ढाल्न कोमानलाई जिम्मेवारी दिइएको छ ।
त्यही कारण धेरै जना पुराना र अनुभवी खेलाडीले क्लब छाड्ने मनसाय देखाएका छन् जसमा मुख्य स्ट्राइकर लियोनेल मेस्सी पनि थिए । मिडफिल्डर इभान राकिटिकले क्लब छाडिसकेका छन् । उनी सेभियामा अनुबन्धित भएका छन् भने डिफेन्डर सामुएल उम्टिटी पनि क्लब छाड्ने सोचाईमा छन् ।
सन् २०१४ मा लिभरपुलबाट बार्सिलोना आएका सुवारेज एटलेटिकोका अर्जेन्टिनी प्रशिक्षक डिएगो सिमियोनसँग जोडिने छन् । डिएगोले सुवारेजलाई निकै प्रशंसा गर्दछन् ।
सुवारेजले शुरुमा इटालीको युभेन्टसमा आबद्ध हुने सोचाई बनाएका थिए, र युरोपेली पासपोर्टका लागि आबेदन पनि दिएका थिए । समयमै कागजी प्रक्रिया पूरा नगरेपछि युभेन्टसले एटलेटिकोबाट अल्भारो मोराटालाई अनुबन्ध गरेको थियो । मोराटा युभेन्टस गएसँगै सुवारेजका लागि एटलेटिकोको ढोका खुलेको थियो ।
एटलेटिकोमा विश्वस्तरीय स्ट्राइकरहरु डिएगो कोस्टा र जोआ फेलिक्स पनि रहेकाले एटलेटिको अब निकै मजबूत बनेको छ ।
उता बार्सिलोनाले पोर्चुगलका युवा स्ट्राइकर फ्रान्सिस्को ट्रिन्काओलाई भित्र्याएको छ । क्लबमा एन्टोनिन ग्रिजम्यान, ओसमान डेम्बेले र युवा आन्सु फाती पनि छन् ।
––
