काठमाडौं । ईंग्लिश प्रीमियर लिग फुटबलमा आर्सनलले जित निकालेको छ ।
केहिबेर अघि सम्पन्न खेलमा आर्सनलले शहरी प्रतिद्वन्दी टोटेनहमलाई २-१ गोलले हराएको हो ।
खेलको २५ औं मिनेटमा हेउङ सनले गोल गर्दै टोटेनहमलाई सुरुवाती अग्रता दिलाएका थिए ।
४० औं मिनेटमा टोटेनहमका डोमिनिक सोलाङ्कीले आत्मघाती गोल गरेपछि आर्सनल १-१ गोलको बराबरीमा आयो । आर्सनलका डिफेन्डर गाब्रीएलले हेडरमार्फत प्रहार गरेको बलमा सोलाङ्कीको आत्मघाती गोल हुन पुग्यो ।
४४ औं मिनेटमा लियान्ड्रो ट्रोसार्डले गोल गर्दै घरेलु टोलि आर्सनललाई २-१ ले अघि बढाए । दोस्रो हाफमा कुनै टोलिले गोल गर्न सकेनन् र ‘नर्थ लण्डन डर्बी’मा आर्सनल विजयी बन्यो ।
जितसँगै आर्सनल अङ्कतालिकाको दोस्रो स्थानमा उक्लिएको छ । उसको २१ खेलबाट ४३ अङ्क छ । टोटेनहम २४ अङ्कका साथ १३ औं स्थानमा छ ।
