काठमाडौँ : दसैँताका नेपाली चलचित्र प्रदर्शनमा भिडभाड देखिए तापनि पुस महिनामा नयाँ चलचित्रको प्रदर्शन सुस्ताएको छ । पुस ५ गते ‘बम बहादुर’ र २६ गते ‘कार्साङ’ प्रदर्शन घोषणा गरिएको छ अर्थात् पुस महिनामा २ वटा मात्र चलचित्र प्रदर्शन हुनेछन् ।
गत वर्ष पुसमा पनि एउटा मात्र नेपाली चलचित्र प्रदर्शन भएको थियो ।
पुस ५ मा प्रदर्शन तय गरिएको चलचित्र ‘बम बहादुर’ मा भारतको दार्जिलिङ पहाड र छिमेकी क्षेत्रमा बसोबास गर्ने नेपाली समुदायको सङ्घर्षको विषयलाई समेटिएको निर्देशक जोन राईको भनाइ छ । सन् १९८६ मा दार्जिलिङमा भएको गोर्खाल्यान्ड आन्दोलनको पृष्ठभूमिमा मानव जीवनका आरोह–अवरोहलाई चलचित्रमार्फत पर्दामा प्रस्तुत गरिएको उनले बताए ।
चलचित्रका मुख्य पात्र बम बहादुरको सङ्घर्षमय जीवनको कथा यहाँ समेटिएको छ । यस चलचित्रको प्रचार दर्शकले नै गर्नेमा विश्वस्त रहेको उनको भनाइ छ ।
यस चलचित्रमा अभिनेता सौगात मल्ल, अभिनेत्री निशा रसाइली, अजय प्रधान, शान्तिला तामाङ, बाल कलाकार वशिस्ट कार्की, प्रभात पाख्रिन, बादल क्षेत्री लगायत छन् ।
यस्तै, पुस २६ मा प्रदर्शन तय गरिएको चलचित्र ‘कार्साङ’ शेर्पा समुदायको कथामा आधारित रहेको निर्देशक यम शेर्पाले जानकारी दिएका छन् ।
चलचित्रमा निकै कम स्थान पाएको शेर्पा समुदायको संस्कृति र कथालाई देखाउने कोसिस गरेको उनको भनाइ छ ।
चलचित्रमा दयाहाङ राई, सिर्जना निङलेखु, जितु नेपाल, दिया मास्के, बुद्धि तामाङ लगायतले अभिनय गरेका छन् ।
