काठमाडौं । प्रमुख प्रतिपक्षी दल नेपाली कांग्रेसकी सांसद सीता थपलियाले मुलुकमा बढ्दो निराशा, अभिव्यक्ति स्वतन्त्रताको संकुचन र कमजोर पूर्वाधार व्यवस्थापनप्रति सरकारको ध्यानाकर्षण गराउनुभएको छ ।
प्रतिनिधि सभाको मंगलबारको बैठकमा बोल्दै सांसद थपलियाले काठमाडौंको त्रिपुरेश्वरमा भएको आत्मदाहको घटनादेखि धादिङको सडक सम्पर्क विच्छेदसम्मका विषयमा सरकार मौन रहेको भन्दै प्रश्न उठाउनुभयो ।
उहाँले महामानव बीपी कोइरालाको भनाइ उद्धृत गर्दै भन्नुभयो, ‘समाजको कुनै वर्गले अन्यायको अनुभव गरिरहेसम्म राष्ट्रको जग मजबुत हुन सक्दैन ।’
त्रिपुरेश्वरमा ट्राफिक प्रहरीसँगको विवादपछि चालकले गरेको आत्मदाहको घटनाले राज्य संयन्त्रको असफलता उजागर गरेको उहाँको दाबी थियो । सय दिनको कार्यकालमा फरक काम गर्ने दाबी गरेको सरकारको आधा वर्ष बितिसक्दा पनि नागरिकको जीवनस्तरमा अपेक्षित सुधार नआएको भन्दै उहाँले चिन्ता व्यक्त गर्नुभयो ।
सांसद थपलियाले अभिव्यक्ति स्वतन्त्रताको विषयमा राजनीतिक विश्लेषक भरत दाहालको पक्राउप्रति समेत आपत्ति जनाउनुभयो । हतकडीले हात बाँध्न सकिए पनि विचारलाई बाँध्न नसकिने भन्दै उहाँले सरकार आलोचना सुन्न र सहन सक्ने अवस्थामा हुनुपर्ने बताउनुभयो ।
उहाँले नागरिकमा बढ्दै गएको निराशा सम्बोधन गर्न तथा राज्य संयन्त्रप्रतिको विश्वास कायम राख्न सरकार गम्भीर हुनुपर्नेमा जोड दिनुभयो ।
