काठमाडौं । सल्यानका विभिन्न स्थानीय तहमा स्क्रब टाइफसको संक्रमण तीव्र रूपमा फैलिएको छ । पछिल्लो एक महिनामा दार्मा गाउँपालिकामा मात्रै स्क्रब टाइफस संक्रमणका कारण सात जनाको मृत्यु भएको नेपाली कम्युनिष्ट पार्टीका सांसद रमेशकुमार मल्लले बताउनुभएको छ ।
प्रतिनिधि सभाको मंगलबारको बैठकमा बोल्दै सांसद मल्लले संक्रमण बढिरहेका बेला स्थानीय स्वास्थ्य संस्थामा रोग पहिचानका लागि आवश्यक परीक्षण किटको समेत अभाव रहेको भन्दै सरकारको ध्यानाकर्षण गराउनुभयो । उहाँले नागरिकको स्वास्थ्यजस्तो संवेदनशील विषयमा बेवास्ता नगर्न सरकारसँग आग्रह गर्नुभयो ।
सांसद मल्लका अनुसार सल्यानको दार्मा, कुमाख र बागचौर गाउँपालिकामा स्क्रब टाइफसको संक्रमण बढिरहेको छ । पछिल्लो दुई महिनामा दार्मा र बागचौरमा ३३५ जनाको परीक्षण गर्दा ११६ जनामा संक्रमण पुष्टि भएको छ । परीक्षण गरिएका मध्ये करिब ३५ प्रतिशतमा संक्रमण देखिएकाले पर्याप्त परीक्षण हुन नसक्दा संक्रमितको वास्तविक संख्या अझ बढी हुनसक्ने उहाँले बताउनुभयो ।
स्थानीय तहले संक्रमण नियन्त्रण तथा परीक्षणका लागि आवश्यक परीक्षण किट, औषधि र स्वास्थ्य सामग्री उपलब्ध गराउन प्रदेश तथा संघीय सरकारसँग माग गर्दै पत्राचार गरेको लामो समय भइसक्दा पनि ठोस सहयोग प्राप्त हुन नसकेको सांसद मल्लको भनाइ छ । परीक्षण किटको अभावमा समयमै रोग पहिचान हुन नसक्दा बिरामी थप जोखिममा परेको उहाँले बताउनुभयो ।
उहाँले जोखिमयुक्त क्षेत्रमा तत्काल घरदैलो स्वास्थ्य परीक्षण सञ्चालन गर्न, जनचेतनामूलक अभियान चलाउन तथा स्वास्थ्यकर्मीलाई आवश्यक अभिमुखीकरण दिन सरकारसँग माग गर्नुभयो । संघ, प्रदेश र स्थानीय तहबीच प्रभावकारी समन्वय गरी संक्रमण नियन्त्रणका लागि तत्काल आवश्यक कदम चाल्नुपर्ने उहाँको भनाइ छ ।
सांसद मल्लले नेपालमा पछिल्ला वर्षहरूमा स्क्रब टाइफसको संक्रमण उल्लेख्य रूपमा बढिरहेको तथ्यांकसमेत प्रस्तुत गर्नुभयो । उहाँका अनुसार आर्थिक वर्ष २०७९/८० मा देशभर ९ हजार २४३ जनामा संक्रमण पुष्टि भएकोमा आर्थिक वर्ष २०८१/८२ मा यो संख्या बढेर २५ हजार ४९४ पुगेको छ ।
विशेषगरी कर्णाली र सुदूरपश्चिम प्रदेशमा स्क्रब टाइफसको जोखिम बढी देखिएको भन्दै उहाँले जोखिमयुक्त क्षेत्रमा औषधि, परीक्षण किट र स्वास्थ्यकर्मीको पर्याप्त व्यवस्था गर्न सरकारको ध्यानाकर्षण गराउनुभयो । स्वास्थ्य सेवा नागरिकको मौलिक हक भएकाले संक्रमण नियन्त्रणका लागि सरकारले तत्काल प्रभावकारी कदम चाल्नुपर्ने उहाँले बताउनुभयो ।
