काठमाडौं । भोटेकोशीमा आएको बाढी तथा डुबानबाट प्रभावित अटोमोबाइल व्यवसायीलाई आवश्यक सहजीकरण तथा समन्वय गर्ने उद्देश्यले नाडा अटोमोबाइल्स एशोसिएसन अफ नेपालले पहल थालेको छ ।
बाढी तथा डुबानका कारण देशका विभिन्न क्षेत्रमा अटोमोबाइल व्यवसायसँग सम्बन्धित पूर्वाधार तथा सम्पत्तिमा ठूलो क्षति पुगेको भन्दै नाडाले प्रभावित सदस्य तथा व्यवसायीलाई आवश्यक सहयोग गर्ने जनाएको हो । बाढीका कारण भन्सार नाका लगायत विभिन्न स्थानमा आयातित सवारीसाधनमा क्षति पुगेको, कतिपय सवारीसाधन हराएको तथा व्यवसायीका गोदाम, कार्यालय, उपकरणलगायत व्यावसायिक सम्पत्तिमा क्षति पुगेको नाडाले जनाएको छ ।
नाडाका अध्यक्ष सुरेन्द्रकुमार उपेत्रीले प्रभावित व्यवसायी तथा सदस्यलाई सहजीकरण गर्न सम्बन्धित सरकारी निकाय, बीमा कम्पनी, बैंक तथा वित्तीय संस्था, भन्सार कार्यालयलगायत सरोकारवाला निकायसँग समन्वय सुरु गरिएको जानकारी दिनुभयो ।
नाडाले प्रभावित सदस्य कम्पनीहरूलाई बाढी तथा डुबानबाट भएको क्षतिको यथार्थ तथा प्रमाणित विवरण सचिवालयमा उपलब्ध गराउन अनुरोध गरेको छ । विवरणमा क्षति भएका तथा हराएका सवारीसाधन, सवारीसाधन रहेको स्थान र सम्बन्धित भन्सार नाका, सवारीसाधनको संख्या तथा प्रकार, गोदाम र कार्यालयमा भएको क्षति, बीमा गरिएको सम्पत्ति तथा सवारीसाधन, बीमा दाबीका लागि आवश्यक कागजात, बैंक तथा वित्तीय संस्थाबाट लिइएको ऋण र अन्य प्रत्यक्ष व्यावसायिक क्षतिको विवरण समावेश गर्न आग्रह गरिएको छ ।
प्राप्त विवरणका आधारमा नाडाले सम्बन्धित निकायसँग आवश्यक समन्वय तथा सहजीकरण गर्ने जनाएको छ । विशेषगरी क्षतिको समग्र विवरण संकलन तथा अभिलेखीकरण गर्ने, बीमा दाबी प्रक्रिया छिटो र सहज बनाउन बीमा कम्पनीसँग समन्वय गर्ने तथा भन्सार नाकामा रहेका हराएका वा क्षतिग्रस्त सवारीसाधनको पहिचान र आवश्यक प्रक्रियाका लागि सम्बन्धित भन्सार कार्यालयसँग समन्वय गर्ने नाडाको योजना छ ।
त्यस्तै, प्रभावित व्यवसायीले बैंक तथा वित्तीय संस्थाबाट लिएको ऋणको पुनर्संरचना, भुक्तानी अवधि पुनरावलोकनलगायत सम्भावित सहजीकरणका विषयमा सम्बन्धित निकायसँग पहल गरिने नाडाले जनाएको छ ।
अटोमोबाइल क्षेत्रमा भएको क्षतिको समग्र विवरण सरकार तथा सम्बन्धित सरोकारवाला निकायसमक्ष प्रस्तुत गरी आवश्यक राहत, सहजीकरण तथा नीतिगत सम्बोधनका लागि पहल गर्ने नाडाको भनाइ छ । यसका लागि आवश्यकताअनुसार समन्वय तथा सहजीकरण समिति गठन गरी प्रभावित सदस्यका समस्या सम्बन्धित निकायसम्म पुर्याउने तयारीसमेत गरिएको छ ।
नाडाले बाढी तथा डुबानबाट प्रभावित आफ्ना सदस्य व्यवसायीलाई यथार्थ क्षतिको विवरण यथाशीघ्र सचिवालयमा उपलब्ध गराई आवश्यक समन्वय तथा सहजीकरणमा सहयोग गर्न आग्रह गरेको छ ।
