काठमाडौं । काठमाडौंको त्रिपुरेश्वरमा ट्राफिक प्रहरीसँगको विवादपछि सार्वजनिक बसमा आगो लगाउँदा मृत्यु भएका चालक अर्जुन लामाको घटनालाई लिएर प्रतिनिधिसभामा सरकारको आलोचना भएको छ ।
नेपाली कम्युनिष्ट पार्टीका प्रमुख सचेतक युवराज दुलालले मंगलबारको प्रतिनिधिसभा बैठकमा घटनालाई राज्यको असफलता र संवेदनहीनताको पराकाष्ठाका रूपमा टिप्पणी गर्दै उच्चस्तरीय न्यायिक छानबिनको माग गर्नुभएको हो ।
सांसद दुलालले ट्राफिक प्रहरी र चालकबीचको विवादलाई सामान्य रूपमा लिन नहुने बताउनुभयो । घटना हुनुअघि नै चालकले आफू दबाबमा रहेको र ज्यान जोखिममा रहेको चेतावनी दिएको भए पनि राज्य संयन्त्रले समयमै संवेदनशीलता नदेखाएको उहाँको आरोप थियो ।
उहाँले केही महिनाअघि यस्तै प्रकृतिको घटनामा गणेश नेपालीको मृत्यु भएको प्रसंग उल्लेख गर्दै ट्राफिक प्रहरीको नियमन गर्ने निकाय तथा प्रहरी प्रशासनको भूमिकामाथि प्रश्न उठाउनुभयो ।
‘यो घटना केवल एक चालकको आवेगको विषय होइन, यसले श्रमिक र नियमनकारी निकायबीचको सम्बन्ध तथा राज्यको संवेदनशीलतामाथि गम्भीर प्रश्न उठाएको छ,’ उहाँले भन्नुभयो, ‘चालकले आफू दबाबमा रहेको चेतावनी दिँदा राज्यले समयमै संवेदनशीलता देखाएको भए यस्तो दुःखद अवस्था आउँथ्यो कि आउँदैनथ्यो भन्ने प्रश्न उठेको छ।’
सांसद दुलालले नियमनकारी निकायलाई मर्यादित, अनुशासित र नागरिकमैत्री बनाउन सरकारसँग आग्रह गर्नुभयो । साथै चालक तथा सहचालकको सामाजिक सुरक्षा सुनिश्चित गर्नुपर्ने उहाँको माग थियो ।
उहाँले सडक क्षेत्रमा कार्यरत लाखौं श्रमिक तथा चालकको अवस्था दयनीय रहेको उल्लेख गर्दै उनीहरूलाई सामाजिक सुरक्षा कोषमा आबद्ध गराउने तथा श्रमिकको सुरक्षा सुनिश्चित गर्ने व्यवस्था प्रभावकारी बनाउनुपर्ने बताउनुभयो ।
त्यस्तै, सवारी चालक अनुमतिपत्रसम्बन्धी विद्यमान झन्झटिलो र अव्यावहारिक कानुनी प्रावधान सच्याउनुपर्ने उहाँले माग गर्नुभयो । घटनाको सत्यतथ्य पत्ता लगाउन अविलम्ब उच्चस्तरीय छानबिन आयोग गठन गरी दोषी देखिए कानुनबमोजिम कारबाही गर्न र छानबिनको निष्कर्ष सार्वजनिक गर्न सरकारसँग उहाँले आग्रह गर्नुभयो ।
उहाँले मृतक चालकप्रति श्रद्धाञ्जली व्यक्त गर्दै परिवारजनमा समवेदना समेत व्यक्त गर्नुभयो ।
