नुवाकोट । नेपाल डिजास्टर रेजिलेन्स फाउन्डेसन (एनडीआरएफ) ले रसुवाको भोटेकोसी बाढीबाट प्रभावित परिवार तथा बालबालिकालाई अत्यावश्यक राहत सामग्री वितरण गरेको छ।
शनिबार एनडीआरएफले आफन्त गुमाएका, घरबार पूर्णरूपमा गुमाएका तथा आमाबुबा दुवै गुमाएर अभिभावकविहीन भएका बालबालिकासहित सरकारी होल्डिङ सेन्टरमा आश्रय लिइरहेका प्रभावितलाई भित्रीवस्त्र तथा लत्ताकपडा वितरण गरेको हो।
विदुर नगरपालिकास्थित अन्नपूर्ण पञ्चकन्या आधारभूत विद्यालयमा रहेका २६ जना अभिभावकविहीन बालबालिका तथा न्यू पृथ्वी माध्यमिक विद्यालयका १३ जना शिक्षक–शिक्षिकालाई दैनिक आवश्यक सामग्रीसमेत हस्तान्तरण गरिएको एनडीआरएफले जनाएको छ।
त्यसैगरी, कभर्ड हल आश्रयस्थलमा रहेका एक सयभन्दा बढी प्रभावितलाई भित्रीवस्त्रसहितका लत्ताकपडा वितरण गरिएको छ।
एनडीआरएफका अध्यक्ष रेजिना प्रधानको नेतृत्वमा पदाधिकारी तथा सल्लाहकार समूहले आश्रयस्थलमै पुगेर राहत सामग्री वितरण गरेको हो।
अध्यक्ष प्रधानले विपद् जुनसुकै बेला जोसुकैमाथि पनि आउन सक्ने भन्दै अहिले गरिएको सानो सहयोगले प्रभावितलाई थप उत्थानशील बन्न र भविष्यमा अरूलाई सहयोग गर्न सक्षम बनाउने विश्वास व्यक्त गरिन्।
राहत सामग्री प्राप्त प्रभावित तथा स्थानीय जनप्रतिनिधिले सहयोगप्रति धन्यवाद दिँदै आवश्यकताका आधारमा सामग्री वितरण गर्ने बताएका छन्।
