काठमाडौँ । बोर्डर–गावस्कर ट्रफीको पहिलो टेस्टमा भारतले अस्ट्रेलियालाई २९५ रनले पराजित गरेको छ । टोलीले ५ खेलको टेष्ट सिरिजमा १–० को अग्रता लिएको छ । दोस्रो खेल ६ डिसेम्बरबाट एडिलेडमा हुनेछ ।
पर्थको ओप्टस स्टेडियममा सोमबार भएको खेलको चौथो दिन ५३४ रनको लक्ष्य पछ्याएको कंगारु टोली दोस्रो इनिङ्समा २३८ रनमा अलआउट भयो ।
यसअघि भारतले ६ विकेटमा ४८७ रनमा दोस्रो इनिङ्स घोषणा गरेको थियो । भारतले पहिलो इनिङ्समा १५० रन बनाएको थियो । जवाफमा अस्ट्रेलियाको पहिलो इनिङ्स १०४ रनमा समेटिएको थियो ।
पर्थको ओप्टस स्टेडियममा अस्ट्रेलियाको यो पहिलो हार हो । टोलीले यसअघि ४ खेल खेलेको थियो र सबै जितेको थियो । अष्ट्रेलियामा भारतको यो अहिलेसम्मकै ठूलो टेस्ट जित हो । यसअघिको सबैभन्दा ठूलो जित २२२ रनको थियो, जब टोलीले सन् १९७७ मा मेलबर्नमा खेलेको थियो ।
अस्ट्रेलियाको दोस्रो इनिङ्समा बुमराह र मोहम्मद सिराजले ३–३ विकेट लिए । ट्राभिस हेड (८९)ले अर्धशतक बनाए । बुमराह खेलको प्लेयर अफ द म्याच चुनिए । उनले पहिलो इनिङ्समा ५ विकेट लिएका थिए ।
पर्थमा भएको खेलमा जित हात पार्दै भारत विश्व टेस्ट च्याम्पियनसिप २०२३–२५ सिजनको अंक तालिकामा फेरि शीर्ष स्थानमा पुगेको छ । टोलीसँग अब ६१.११% अंक छ । योसँगै अस्ट्रेलियाको टोली ५७.६९% अंकसहित दोस्रो स्थानमा झरेको छ ।
