एजेन्सी । २२ ग्रान्डस्लाम जितेका स्पेनका राफेल नाडालले टेनिसबाट सन्यास लिएका छन् । ३८ वर्षीय नाडालले आफ्नो डेभिस कप करियरको अन्तिम खेल मंगलबार (नोभेम्बर १९) मा घरेलु मैदान मलागामा खेलेका थिए, यद्यपि उनले खेल हारे ।
उनी ८० औं वरियताका नेदरल्याण्ड्सका बोटिक भान डे जेडस्चल्पसँग ६–४, ६–४ ले पराजित भएका थिए । लगातार २९ खेल जित्दै नाडाल डेभिस कपमा पराजित भएका छन् । मार्टिन कार्पेना एरिनामा एक भावनात्मक भिडियो मार्फत ३८ वर्षीय लिजेन्डलाई बिदाइ गरिएको थियो ।
नाडालले आफ्नो सन्यासको सम्मानमा आयोजित समारोहमा धेरैलाई श्रेय दिए । उनले आफ्नो काका टोनी नाडालको नाम लिए । टोनीले नाडाललाई टेनिस खेल्न प्रेरित गरेका थिए । उनले नाडाललाई तालिम पनि दिएका थिए ।
नाडाल पुरुष एकलमा सबैभन्दा धेरै ग्रान्डस्लाम जित्ने दोस्रो खेलाडी हुन् । नाडालले २२ उपाधि जितेका छन् । सबैभन्दा धेरै ग्राण्डस्लाम जित्ने सन्दर्भमा सर्बियाका नोभाक जोकोभिचले अहिलेसम्म २४ वटा ग्रान्डस्लाम जितेका छन् । ४ वर्षअघि स्विट्जरल्याण्डका महान टेनिस खेलाडी रोजर फेडेररले सन्यास लिएका थिए । अब नाडालले पनि खेललाई अलविदा गरिसकेका छन् । फेडेररले २० ग्रान्डस्लाम उपाधि जितेका थिए ।
नाडाल सबैभन्दा बढी १४ पटक फ्रेन्च ओपनको उपाधि जित्ने पुरुष खेलाडी हुन् । त्यसैले नाडाललाई ‘रातो बजरीको राजा’ भनिन्छ । फ्रेन्च ओपन क्ले कोर्ट अर्थात रातो बजरीबाट बनेको कोर्टमा खेलिन्छ ।
रातो बजरीका राजा भनेर चिनिने नाडालले सन् २०२२ मा १४ औं पटक फ्रेन्च ओपनको उपाधि जितेर इतिहास रचेका थिए । नाडालले २०२२ मा ३६ वर्षको उमेरमा ट्रफी जित्दा उनी प्रतियोगिताको इतिहासमा सबैभन्दा बढी उमेरका च्याम्पियन बने । नाडालले १९ पटक फ्रेन्च ओपनमा भाग लिँदा ११२ खेल जितेका छन् भने ४ पटक मात्रै हार बेहोरेका छन्, जुन कुनै एक ग्रान्डस्लाममा पुरुष र महिलातर्फको विश्व कीर्तिमान हो ।
नाडालले गोल्डेन स्लाम पनि जितेका छन् । उनी गोल्डेन स्लाम जित्ने विश्वका तीन पुरुष खेलाडीमा पर्छन् । नाडालले सन् २००८ मा बेइजिङ ओलम्पिकमा स्वर्ण पदक जितेर गोल्डेन स्लाम पूरा गरेका थिए । गोल्डेन स्लाम भनेको सबै चार ग्रान्डस्लाम र ओलम्पिक स्वर्ण जित्ने खेलाडी हो । अर्थात् अस्ट्रेलियन ओपन, फ्रेन्च ओपन, विम्बल्डन, युएस ओपनसँगै ओलम्पिक च्याम्पियन बन्ने खेलाडी ।
