काठमाडौं । शिक्षा तथा खेलकुदमन्त्री सस्मित पोखरेलले देशभरका विभिन्न सामुदायिक विद्यालयका प्रधानाध्यापकहरूसँग शिक्षा क्षेत्रका समसामयिक विषयमा छलफल गर्नुभएको छ।
बुधबार शिक्षा तथा खेलकुद मन्त्रालयमा आयोजित छलफलमा सामुदायिक विद्यालयको शैक्षिक गुणस्तर सुधार, विद्यालय व्यवस्थापनलाई प्रभावकारी बनाउने, शिक्षक तथा कर्मचारी व्यवस्थापन सुदृढ गर्ने तथा विद्यार्थीको सिकाइ उपलब्धि अभिवृद्धि गर्ने उपायबारे विस्तृत रूपमा विचार–विमर्श गरिएको मन्त्रालयले जनाएको छ।
छलफलका क्रममा प्रारम्भिक बालविकास (ईसीडी) कार्यक्रमलाई अझ प्रभावकारी बनाउने, विद्यालय तहमा विद्यार्थीहरूको मानसिक स्वास्थ्य प्रवर्द्धनका लागि आवश्यक कार्यक्रम तथा योजना सञ्चालन गर्ने विषयमा समेत विशेष जोड दिइएको थियो।
मन्त्री पोखरेलले सामुदायिक विद्यालयलाई गुणस्तरीय, समावेशी र विद्यार्थीमैत्री बनाउन सरकार प्रतिबद्ध रहेको उल्लेख गर्दै प्रधानाध्यापकहरूबाट प्राप्त सुझावलाई नीति तथा कार्यक्रम निर्माणमा समेटिने बताउनुभएको मन्त्रालयले जनाएको छ।
