काठमाडौँ । घरेलु टोलि नेपालले साफ माहिला च्याम्पियनसिप–२०२४ को फाइनमा स्थान बनायो । आइतबारको चिसो साँझ दशरथ रंगशालामा भने खचाखच भरिएको दर्शकले गर्दा गर्माएको थियो । १५ हजार क्षमता भएको दशरथ रंगशालामा १८ हजार बढी दर्शक उपस्थित थिए ।
सन् २०२२ को इतिहास दोहोर्याउँदै नेपाल उपाधि नजिक पुगेको छ । नेपालले यसअघि सन् २०२२ मा घरेलु मैदानमै भएको साफमा भारतविरुद्ध ऐतिहासिक जित निकालेको थियो जसमा रश्मीकुमारी घिसिङले निर्णायक गोल गरेकी थिइन् । साफ महिला च्याम्पियनसिप अन्तर्गत नेपालले भारतविरुद्ध निकालेको यो पहिलो जित थियो । त्यसअघि नेपाल पाँचमध्ये चार संस्करणको फाइनलमा र एक संस्करणको सेमिफाइनलमा भारतसँग नै स्तब्ध भएको थियो ।
आइतबार तीन घण्टा ३० मिनेटसम्म रंगशालाभित्र यस्ता थुप्रै घटनाहरु घटे जसको साक्षी बनेका दर्शकले सायदै त्यो क्षण भुल्नेछन् । रेफ्रीको निर्णयबाट आक्रोशित बनेका दर्शक जब नेपालकी प्रमुख खेलाडी साबित्रा भण्डारीले फर्काएको बराबरी गोलमा यसरी खुसी मनाए कि दशरथ रंगशाला नै थर्किन पुग्यो ।
रेफ्रीको ‘गलत निर्णय’, रेखा पौडेलको रातो कार्ड, दर्शकको ‘रेफ्री आउट’ नाराबाजी र नेपालले गरेको गोलले मान्यता नपाएपछि दोस्रो हाफको खेल निकै तनावग्रस्त बन्न पुगेको थियो । जसका कारण खेल १ घण्टा ६ मिनेटसम्म रोकिन पुग्यो ।
खेलको ‘प्लेयर अफ द म्याच’ साबित्राले पनि नेपालको जितमा दर्शकको साथ नै प्रमुख कारण बताएकी थिइन् । खेल सकिएपछि सञ्चारकर्मीसँग उनले भारत बलियो टोली रहेको स्वीकार्दै उनीहरु खचाखच भरिएको नेपाली दर्शकको अगाडि आफ्नो फुटबल खेल्न नसकेको प्रतिक्रिया दिएकी थिइन् ।
नेपालले अब फाइनलमा बंगलादेश प्रतिद्वन्द्वी पाएको छ । नेपालले घरेलु मैदानमा पहिलो पटक च्याम्पियन बन्ने लक्ष्य राखेको छ । सन् २०२२ मा नेपाल पहिलो पटक बंगलादेशसँग पराजित हुँदा उपाधि जित्ने राम्रो अवसर गुमाएको थियो । यसअघि नेपाल बंगलादेशविरुद्ध कुनै खेलमा हारेको थिएन । तर, बुधबार हुने फाइनल खेलमा नेपालले घरेलु दर्शकको साथ–समर्थनमा यसअघिको गल्ती नदोहोर्याइ उपाधि उचाल्ने लक्ष्य लिएको छ ।
खेलको नतिजाः
नेपालले भारतलाई टाइब्रेकरमा ४–२ गोलले हराउँदै फाइनलमा स्थान बनायो । निर्धारित समयमा दुवै टोलीले एक–एक गोलको बराबरी खेलेपछि खेल टाइब्रेकरमा गएको थियो ।
दुवै टोलीले पहिलो हाफमा गोलरहित बराबरी खेलेका थिए । मध्यान्तरपछिको खेलमा नेपालकी रेखा पौडेलले रातो कार्ड पाएपछि मैदान छोड्नु परेको थियो । खेलको ५१औँ मिनेटमा दोहोरो पहेँलो कार्ड पाएपछि उनले मैदान छोड्नु परेको हो ।
१० खेलाडीमा सीमित नेपालमाथि दोस्रो हाफमा भारतकी सङ्गीता बास्फोरले उत्कृष्ट गोल गर्दै अग्रता दिलाएकी थिइन् । भारतले गोलको खुसी मनाइरहेको अवस्थामा नेपालले लगत्तै गोल गरेको थियो । तर रेफ्रीले उक्त गोललाई मान्यता दिएनन् । तनावका कारण खेल लामो समयसम्म रोकिएको थियो ।
खेल पुनः सुरु भए लगत्तै नेपालकी सावित्रा भण्डारी ‘साम्बा’ले गोल गर्दै खेललाई एक–एक गोलको बराबरीमा पुर्याइन् । त्यसपछि गोल हुन नसक्दा खेल टाइब्रेकरमा धकेलिएको थियो ।
टाइब्रेकरमा नेपालले चार तथा भारतले दुई गोल गर्यो । नेपालका सावित्रा भण्डारी, गीता रानामगर, सविता रानामगर र अमिसा कार्की चारै जना गोल गर्न सफल भए ।
