काठमाडौं । सोमबार शेयर बजार ७२ दशमलव २८ अंकले बढेर २ हजार ४ दशमलव ३९ विन्दुमा पुगेको छ । आइतबार ६ प्रतिशतको नकारात्मक सर्किटबाट प्रभावित भएको बजार सोमबार भने सुधार भएर पुरानै लयमा फर्किएको छ । यो दिन ठूला कम्पनीहरुको कारोबार मापक सेन्सेटिभ इन्डेक्स पनि दोहोरो १२ दशमलव १० अंकले बढेर ३८२ दशमलव ७७ विन्दुमा पुगेको छ । कारोबारमा आएका १२ समूहकै परिसूचक बढेकाले पनि समग्र नेप्से परिसूचकमा उच्च वृद्धि देखिएको हो ।
सोमबार निर्धारित अवधिभर रू. ६ अर्ब ६६ करोड ७९ लाख ५६ हजार बराबरको शेयर कारोबार भएको छ । यस दिन २०६ कम्पनीको ६० हजार ५५ पटकको व्यापारमा १ करोड १९ लाख २० हजार ८१९ कित्ता शेयर कारोबार भएको हो । आइतबार ३ घण्टा १३ मिनेटको कारोबारमा रू. ७ अर्ब २० करोड ९१ लाख ८० हजार बराबरको शेयर खरीदविक्री भएको थियो । आइतबार १२३ अंक घटेर १ हजार ९३२ दशमलव ११ विन्दुमा बन्द भएको बजार सोमबार १ हजार ९२९ दशमलव ४७ विन्दुदेखि खुलेको हो ।
सोमबार व्यापारिक समूहको परिसूचक सर्वाधिक ६ दशमलव ५७ प्रतिशत बढेको छ । यो दिन व्यापारिक समूहका लगानीकर्ताहरुले सर्वाधिक कमाएका छन् । त्यस्तै जीवन बीमा समूहको परिसूचक पनि सोमवार ६ दशमलव शून्य ४ प्रतिशत बढेको छ । बैंकिङ समूहको २ दशमलव २३ प्रतिशत, होटल समूहको ३ दशमलव शून्य ५ प्रतिशत, विकास बैंकको २ दशमलव शून्य २ प्रतिशत, जलविद्युत ५ दशमलव ९९ प्रतिशत, वित्त २ दशमलव ३६ प्रतिशत, निर्जीवन बीमा ४ दशमलव ३४ प्रतिशत, उत्पादन तथा प्रशोधन ५ दशमलव शून्य ९ प्रतिशत, अन्य ४ दशमलव ९३ प्रतिशत, लघुवित्त ४ दशमलव ३ प्रतिशत र म्यचुअल फण्डको परिसूचक शून्य दशमलव ७२ प्रतिशत बढेको छ ।
उच्च अंकले बढेको सोमबारको बजारमा एभरेष्ट इन्स्योरेन्सको संस्थापक शेयरको मूल्य सर्वाधिक ६ दशमलव ६७ प्रतिशतले घटेको छ । यस कम्पनीको संस्थापक शेयरको मूल्य प्रतिकित्ता रू. २० ले घटेर अन्तिम मूल्य रू. २८० मा झरेको हो । यस दिन नारायणी डेभलपमेण्ट बैंक र रसुवागढी हाइड्रोपावर कम्पनीको शेयरमूल्य १० प्रतिशतले बढेको छ भने विशाल बजार कम्पनी, ग्लोबल आइएमई लघुवित्त, अपर तामाकोशी र साञ्जेन जलविद्युत कम्पनीको शेयरमूल्य ९ प्रतिशतभन्दा बढीले वृद्धि भएको छ ।
सोमबार पनि नेपाल पुनर्बीमा कम्पनीको सर्वाधिक रकमको शेयर कारोबार भएको छ । यस कम्पनीको रू. १ अर्ब ५ करोड ५७ लाख ५९ हजार बराबरको शेयर कारोबार भएको हो । आइतबार एकै दिन रू. १७३ ले शेयरमूल्य घटेको यो कम्पनीको शेयरमूल्य सोमबार भने प्रतिकित्ता रू. ६८ ले वृद्धि भएको छ । यो दिन कम्पनीको अन्तिम मूल्य प्रतिकित्ता रू. १ हजार ६३० कायम भएको हो ।
