काठमाडौं । नेपाल धितोपत्र बोर्ड (सेबोन) ले नेपाल स्टक एक्सचेन्ज (नेप्से) को संरचनागत सुधार तथा प्राविधिक सुदृढीकरणको प्रक्रिया अघि बढाउने भएको छ ।
अर्थ मन्त्रालयबाट प्राप्त निर्देशनअनुसार अघिल्लो सरकारका पालामा रामेश्वर खनाल नेतृत्वको समितिले बुझाएको प्रतिवेदन कार्यान्वयनमा लैजाने तयारी भइरहेको सेबोनका अध्यक्ष डा. गोपालप्रसाद भट्टले जानकारी दिनुभयो ।
बुधबार संघीय संसद्को अर्थ समितिको बैठकमा बोल्दै अध्यक्ष भट्टले नेप्सेको विद्यमान संरचना तथा पछिल्ला दिनमा देखिएका साइबर सुरक्षा चुनौतीलाई बोर्डले गम्भीर रूपमा लिएको बताउनुभयो । उहाँले नेप्सेको कार्यक्षमता, सुशासन, सूचना प्रविधि प्रणाली र संस्थागत क्षमता सुधारलाई प्राथमिकतामा राखेर पुनर्संरचना प्रक्रिया अघि बढाइने जानकारी दिनुभयो ।
अध्यक्ष भट्टका अनुसार आगामी सातादेखि नेप्सेको सञ्चालक समितिसँग छलफल गरी बोर्डको क्षेत्राधिकारभित्र पर्ने सुधारका काम अघि बढाइनेछ । नेप्सेको स्वामित्व तथा समग्र संरचनागत परिवर्तन भने सरकारको क्षेत्राधिकारमा पर्ने उहाँले स्पष्ट पार्नुभयो ।
यसैगरी, सीडीएस एन्ड क्लियरिङ लिमिटेड (सीडीएससी) को सुधारका लागि अर्थ मन्त्रालयबाट प्राप्त २१ बुँदे निर्देशन कार्यान्वयनको प्रक्रिया पनि सुरु भएको छ । सीडीएससीलाई भविष्यमा ‘सेन्ट्रल काउन्टर पार्टी’ का रूपमा विकास गर्ने योजना रहेको अध्यक्ष भट्टले बताउनुभयो । यस्तो व्यवस्थाले शेयर खरिद–बिक्रीमा थप सुरक्षा तथा कारोबारको ग्यारेन्टी सुनिश्चित गर्ने अपेक्षा गरिएको छ ।
पुँजी बजारको दायरा विस्तार गर्न बोर्डले इन्ट्राडे ट्रेडिङ, सर्ट सेलिङ र डेरिभेटिभ्सजस्ता नयाँ वित्तीय उपकरण सञ्चालनका लागि आवश्यक पूर्वाधार विकासको तयारीसमेत गरिरहेको जनाएको छ ।
अध्यक्ष भट्टले नयाँ उपकरण र व्यवस्थाका लागि आवश्यक प्राविधिक तथा संस्थागत पूर्वाधार तयार पार्दै नेपाली पुँजी बजारको संरचना थप व्यवस्थित र सुरक्षित बनाउने दिशामा काम भइरहेको बताउनुभयो ।
