काठमाडौँ । राष्ट्रिय प्रजातन्त्र पार्टीले सनातन हिन्दूराष्ट्र एवं राजसंस्थासहितका प्रजातन्त्रको मान्यता अभिवृद्ध गर्न र कायम गर्न भन्ने पार्टीको विधानको प्रस्तावना हटाउन निर्वाचन आयोगले गरेको पत्र नेपालको संविधानको मर्म र भावना विपरीत भएको बताएको छ ।
पार्टी अध्यक्ष राजेन्द्र लिङ्देनको अध्यक्षतामा आइतबार बसेको केन्द्रीय पदाधिकारीको बैठकले पार्टीको विधानको धारा ४(क) मा उल्लेखित झण्डाको मध्य भागमा गाई चिह्न भएको भन्ने वाक्यांश हटाउन आयोगले पठाएको पत्र राप्रपाको मूल्य र मान्यता विपरीत रहेको, विगतमा पार्टीले प्रयोग गर्दै आएको, निर्वाचन आयोगले समेत मान्यता प्रदान गरेको तथा राप्रपाको झण्डामा र राप्रपाको चुनाव चिह्नको रुपमा समेत प्रयोग भई स्थानीय तह, प्रादेशिक तथा संघीय निर्वाचनामा समेत निर्वाचित भएका सन्दर्भमा आयोगको निर्देशन पूर्वाग्रही देखिएको ठहर गरेको छ ।
बैठकले निर्वाचन आयोगले पार्टीलाई पठाएको पत्रको जवाफ उपयुक्त समयमा दिने तथा आयोगको पत्रका सम्बन्धमा कानूनी र राजनीतिक उपचार खोज्नेसमेत निर्णय गरेको पार्टीका महामन्त्री भुवन पाठकले जारी गर्नुभएको प्रेस विज्ञप्तिमा जनाइएको छ । निर्वाचन आयोगले राप्रपालाई ‘सनातन हिन्दूराष्ट्र एवं राजसंस्थासहितको प्रजातन्त्र’ को मान्यता अभिवृद्धि गर्न र कायम गर्न भन्ने विधानको प्रस्तावनामा राखिएको वाक्यांश नेपालको संविधानको प्रस्तावना एवं भावनाको प्रतिकूल देखिएको भन्दै सो वाक्यांश हटाई नेपालको संविधानको धार २६९ तथा राजनीतिक दलसम्बन्धी ऐन, २०७३ अनुकूल हुने गरी गर्न भनी पत्र पठाएको थियो । त्यस्तै आयोगले पार्टीको झण्डाको मध्यभागमा गाई चिह्न भएको हटाउनसमेत निर्देशन दिएको थियो ।
