काठमाडौं । राप्रपा नेपालका अध्यक्ष कमल थापाले समानुपातिक र समावेशी प्रतिनिधित्व कमजोर बनाउने तथा वैकल्पिक राजनीतिक शक्तिहरूलाई निषेध गरी सिमित दलहरूको सिण्डिकेट खडा गर्ने षडयन्त्र संबिधानको भावनाविपरित अधिनायकवादी सोच भएको बताएका छन् ।
समानुपातिक र समावेशीतालाइ नजरअन्दाज गरिए त्यो सैह्य नहुने समेत थापाको भनाई छ ।
पार्टीको काठमाडौं–४ स्तरीय प्रशिक्षण कार्यक्रममा बोल्दै थापाले अन्य बिचार र भावनालाई कुण्ठित गर्ने प्रयास सर्बसत्ताबादी र अधिनायकबादी सोँच भएको टिप्पणी गरे ।
लोकतन्त्रको खोल ओढेर लोकतन्त्रकै गला निमोठ्न खोज्नु लज्जास्पद भएको भन्दै थापाले मुलुकलाई हिँडाइएको मार्गचित्र गलत भएको दाबी गरे । ‘यो बाटोबाट देश बनाउन र बचाउन गाह्रो भयो, अब मार्ग परिवर्तन गरौँ ।’ थापाले भने ।
सबैलाई अट्न नदिए व्यवस्थाको आयु सकिने उनको धारणा थियो । थापाले संगठन निर्माण र जनसंघर्षको योजनालाई उच्च प्राथमिकतामा राखेर काम गर्न कार्यकर्ताहरुलाई आग्रह गरे ।
देश बनाउन र बचाउन आन्दोलनको विकल्प नभएकोले सबै बिचार मिल्नेहरु एक ठाउँमा आएर आन्दोलनको तयारी गर्नुपर्नेमा उनको जोड थियो । कार्यक्रममा डाक्टर बिष्णु भण्डारी , राजाराम बर्तौला ‘चुनेली’, श्याम खत्री, यबती कार्की लगायतले बोलेका थिए ।
