काठमाडौं । राष्ट्रिय स्वतन्त्र पार्टी (रास्वपा) का सांसद हरिमोहन भण्डारीले संघीय संसद्को क्यान्टिनमा खाद्यवस्तुको मूल्य अत्यधिक महँगो भएको गुनासो गर्नुभएको छ ।
बुधबार बसेको प्रतिनिधि सभा बैठकमा बोल्दै सांसद भण्डारीले क्यान्टिनको मूल्य अस्वाभाविक रूपमा महँगो भएको भन्दै संसद् सचिवालयको ध्यानाकर्षण गराउनुभएको हो ।
उहाँले क्यान्टिनमा खाजाको मूल्य महँगो हुँदा सांसदहरूले समेत समस्या भोग्नुपरेको बताउनुभयो । माननीयहरूको तलबले खानपानलगायतका खर्च धान्न कठिन हुने भन्दै उहाँले व्यङ्ग्यसमेत गर्नुभयो ।
उहाँले भन्नुभयो, ‘क्यान्टिनमा रेटको कुनै तालमेल छैन । खाजा महँगो छ, जसले गर्दा माननीयहरूले सास्ती भोग्नुपरेको छ । भोकभोकै बस्नुपर्ने वा महँगो मूल्य तिर्नुपर्ने दुवै विकल्प पीडादायी छन्, यसतर्फ संसद् सचिवालयको ध्यान जानु जरुरी छ ।’
सांसद भण्डारीले क्यान्टिनमा खाद्यवस्तुको गुणस्तर र मूल्य नियन्त्रणका लागि तत्काल आवश्यक कदम चाल्नुपर्ने बताउनुभयो । उहाँले क्यान्टिन क्षेत्रमा लामखुट्टेको प्रकोपसमेत बढेको भन्दै सरसफाइमा ध्यान दिन संसद् सचिवालयसँग आग्रह गर्नुभयो ।
बैठकमा उहाँले आफ्नो निर्वाचन क्षेत्रमा प्राकृतिक विपत्तिका कारण जनजीवन प्रभावित भएको विषयसमेत उठाउँदै त्यसतर्फ पनि राज्यको ध्यान जानुपर्ने बताउनुभयो।
