काठमाडौं । सत्तारुढ दल राष्ट्रिय स्वतन्त्र पार्टी (रास्वपा) का सांसद शम्भुप्रसाद ढकालले जेन–जी आन्दोलनका घाइते, शहीद परिवार तथा कर्तव्य पालनाका क्रममा ज्यान गुमाएका सुरक्षाकर्मीका आश्रित परिवारको दयनीय अवस्थाप्रति सरकारको ध्यानाकर्षण गराउनुभएको छ।
बिहीवार बसेको प्रतिनिधि सभा बैठकमा बोल्दै सांसद ढकालले राज्यले गरेका प्रतिबद्धता पूरा गर्न नसक्नु र परिवर्तनका लागि संघर्ष गरेका नागरिकलाई सडकमा अलपत्र पार्नु गम्भीर त्रुटि भएको बताउनुभयो।
उहाँले २०८२ मंसिर २४ गते जेन–जी आन्दोलनकारीसँग भएको सम्झौता अझै कार्यान्वयन नभएको भन्दै असन्तुष्टि जनाउनुभयो। घाइते तथा शहीद परिवारले २३ बुँदे माग राखेर संघर्ष गरिरहेको उल्लेख गर्दै उहाँले राज्यले तत्काल सम्बोधन गर्न सक्ने मागमा समेत ढिलाइ गर्न नहुने बताउनुभयो।
सभामुखमार्फत सरकारको ध्यानाकर्षण गराउँदै ढकालले भन्नुभयो, “खोलो तरेपछि लौरो बिर्सने हो ? परिवर्तनका लागि लडेका घाइतेहरू शरीरमा गोलीका छर्रा बोकेर देश–विदेशमा मजदुरी गर्न बाध्य छन्, यो राज्यका लागि लज्जाको विषय हो।”
उहाँले स्वास्थ्य मन्त्रालयसँग हालै भएको पाँचबुँदे सहमति पूर्ण रूपमा कार्यान्वयन गर्न सरकारसँग माग गर्नुभयो। साथै, कर्तव्य पालनाका क्रममा ज्यान गुमाउने सुरक्षाकर्मीका परिवारलाई सरकारले उपलब्ध गराउँदै आएको १० लाख रुपैयाँको राहत अपर्याप्त रहेको भन्दै त्यसलाई पुनरावलोकन गर्नुपर्ने धारणा राख्नुभयो।
