काठमाडौं । राष्ट्रिय स्वतन्त्र पार्टीका सांसद ज्ञानेन्द्र सिंह महताले बिरामीको ज्यान बचाउनुपर्ने आपत्कालीन हवाई उद्धारमा प्रक्रियागत तथा कानूनी जटिलता देखिएको भन्दै सरकारको ध्यानाकर्षण गराउनुभएको छ ।
बिहीवार प्रतिनिधि सभा बैठकमा बोल्दै सांसद महताले आफ्नो परिवारकी सदस्यको उपचारका क्रममा सरकारी निकायबाट अपेक्षित सहयोग नपाएको बताउनुभयो । कञ्चनपुरस्थित महाकाली अस्पतालमा भदौ ६ गते भर्ना भएकी भाइबुहारीको शल्यक्रियापछि स्वास्थ्य अवस्था जटिल बनेपछि चिकित्सकले सुविधासम्पन्न अस्पतालमा लैजान सुझाव दिएको उहाँले बताउनुभयो ।
त्यसपछि आपत्कालीन हवाई उद्धारका लागि स्वास्थ्य तथा जनसंख्या मन्त्रालय, गृह मन्त्रालय र महिला, बालबालिका तथा ज्येष्ठ नागरिक मन्त्रालयमा सम्पर्क गरे पनि जिम्मेवार पदाधिकारीबाट फोन नउठ्ने तथा फोन उठे पनि कानूनी जटिलता देखाएर पन्छिने अवस्था आएको उहाँको भनाइ थियो ।
सभामुखको सहयोगमा केही प्रयास भए पनि अन्ततः निजी क्षेत्रको हेलिकप्टर प्रयोग गरेर बिरामीलाई उद्धार गर्नुपरेको सांसद महताले बताउनुभयो ।
उहाँले राज्यको संयन्त्रमा पहुँच भएको सांसदले समेत आपत्कालीन अवस्थामा यति धेरै समस्या झेल्नुपरेको उल्लेख गर्दै दूरदराजका सर्वसाधारणले कसरी समयमै उपचार पाउने भन्ने प्रश्न गर्नुभयो ।
‘म एक सांसद भएर राज्यको संयन्त्रसम्म पहुँच हुँदा त यति धेरै सास्ती छ भने दूरदराजका सर्वसाधारण नागरिकले कसरी आपत्कालीन उपचार पाउँछन् ?’ उहाँले प्रश्न गर्नुभयो ।
सांसद महताले चिकित्सकको सिफारिसका आधारमा तत्काल हवाई उद्धार गर्न सकिने व्यवस्था लागू गर्न सरकारसँग माग गर्नुभयो । उहाँले स्वास्थ्य तथा जनसंख्या मन्त्रालय, गृह मन्त्रालय, नेपाली सेना र नागरिक उड्डयन प्राधिकरणबीच २४ सै घण्टा समन्वय हुने स्थायी संयन्त्र निर्माण गर्नुपर्नेमा जोड दिनुभयो ।
कानून नागरिकको जीवन रक्षा गर्नका लागि हुनुपर्ने भन्दै उहाँले आपत्कालीन अवस्थामा कानून तथा प्रक्रियागत जटिलता नै जीवन बचाउने काममा अवरोध बन्न नहुने बताउनुभयो ।
