काठमाडौं । नेपालमा विकसित न्यून चापीय प्रणालीका कारण आगामी केही दिन भारी वर्षाको सम्भावना बढेसँगै राष्ट्रिय स्वतन्त्र पार्टीका सांसद डा. धनञ्जय रेग्मीले बाढी तथा पहिरोको जोखिमप्रति गम्भीर सतर्कता अपनाउन सरकारको ध्यानाकर्षण गराउनुभएको छ ।
बिहीवार बसेको प्रतिनिधि सभा बैठकमा विशेष समय लिएर बोल्दै उहाँले नागरिकलाई घरमै बस्न आग्रह गर्ने सूचना मात्र पर्याप्त नहुने भन्दै पहिरो जानुअघि देखिने पूर्वसंकेतबारे समेत व्यापक जनचेतना फैलाउनुपर्ने बताउनुभयो ।
सांसद रेग्मीले पहाडी क्षेत्रमा बसोवास गर्ने नागरिकले घर वरपरको भू–धरातलमा देखिने असामान्य परिवर्तनप्रति विशेष निगरानी राख्नुपर्नेमा जोड दिनुभयो । उहाँले जमिनमा नयाँ चिरा पर्नु, जमिन धसिनु, रुख वा बिजुलीका खम्बा अस्वाभाविक रूपमा ढल्किनु, घरको जगमा चिरा देखिनु तथा पहिले नभएको स्थानबाट अचानक पानी निस्किनुलाई पहिरोका सम्भावित पूर्वसंकेतका रूपमा लिनुपर्ने बताउनुभयो ।
यस्ता संकेत देखिएमा जोखिमयुक्त घरमा नबसी समयमै सुरक्षित स्थानमा सर्न नागरिकलाई सचेत गराउनुपर्ने उहाँको भनाइ छ । विगतमा रातिको समयमा पहिरोले मानिस सुतिरहेकै अवस्थामा घर पुरिँदा ठूलो मानवीय क्षति भएका घटनालाई स्मरण गर्दै उहाँले विपद् आउनुअघि नै जोखिम पहिचान र सुरक्षित स्थानान्तरणमा जोड दिनुभयो ।
‘सरकारले घर बाहिर ननिस्कन आग्रह गर्नु सकारात्मक छ, तर घर वरपरको जमिन कत्तिको सुरक्षित छ भन्ने कुराको जानकारी जनतालाई दिनु झनै जरुरी छ,’ उहाँले भन्नुभयो ।
सांसद रेग्मीले बाढीको जोखिमलाई मात्र केन्द्रमा राख्ने प्रवृत्तिभन्दा माथि उठेर पहिरोका पूर्वसंकेतबारे पनि प्राथमिकताका साथ सूचना प्रवाह गर्न सरकारलाई आग्रह गर्नुभयो । उहाँले एफएम रेडियो, टेलिभिजन, मोबाइल एप, कलरिङ ब्याकटोन तथा सामाजिक सञ्जालमार्फत पहिरोका पूर्वसंकेतबारे सरल भाषामा व्यापक जनचेतना फैलाउनुपर्ने बताउनुभयो ।
विपद् आएपछि उद्धारमा जुट्नुभन्दा जोखिमको सूचना समयमै नागरिकको घर–घरमा पुर्याएर सम्भावित क्षति न्यूनीकरण गर्नु नै प्रभावकारी विपद् व्यवस्थापन हुने उहाँको भनाइ थियो ।
