काठमाडौँ । नेपाल यातायात व्यवसायी राष्ट्रिय महासंघले भारी वर्षासँगै बाढी, पहिरो, गेग्रान बहाव तथा डुबानको जोखिम रहेकाले यातायात व्यवसायी, चालक, सहचालक, कर्मचारी तथा यात्रुलाई सजग र संयमित रहन अपिल गरेको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरण (एनडीआरआरएमए) तथा सम्बन्धित निकायबाट जारी पूर्वसूचनाअनुसार असोज ८ गतेदेखि ११ गतेसम्म देशका विभिन्न स्थानमा भारीदेखि अति भारी वर्षा हुने सम्भावना रहेकाले यातायात क्षेत्रमा उच्च सतर्कता अपनाउन आग्रह गरिएको महासंघका अध्यक्ष पुण्यप्रसाद सिटौलाले जानकारी दिनुभयो।
अध्यक्ष सिटौलाले विशेषगरी पहिरोको जोखिम रहेका सडक, नदी तथा खोलानजिकका क्षेत्र र कमजोर सडकखण्डमा अनावश्यक यात्रा नगर्न आग्रह गर्नुभएको छ। रातिको समयमा लामो दूरीको यात्रा सकेसम्म स्थगित गर्न तथा यात्रा गर्नैपर्ने अवस्था भएमा मौसम र सडकको पछिल्लो अवस्थाबारे जानकारी लिएर मात्र सुरक्षित यात्रा गर्न उहाँले अनुरोध गर्नुभएको छ।
“सवारी साधन चलाउनु मात्र हाम्रो जिम्मेवारी होइन, यात्रुको जीवन सुरक्षित रूपमा गन्तव्यसम्म पुर्याउनु हाम्रो पहिलो कर्तव्य हो,” अध्यक्ष सिटौलाले जारी गर्नुभएको अपिलमा भनिएको छ।
उहाँले सम्भावित जोखिमलाई सामान्य रूपमा नलिई पूर्वसावधानीलाई प्राथमिकता दिन तथा सम्बन्धित निकाय, यातायात व्यवसायी र श्रमिकलाई आ–आफ्नो क्षेत्रमा आवश्यक पूर्वतयारीसहित उच्च सतर्कता अपनाउन आग्रह गर्नुभएको छ।
“सुरक्षित यात्रा नै हाम्रो साझा जिम्मेवारी हो। सावधानी अपनाऔँ, जीवन बचाऔँ,” अध्यक्ष सिटौलाले अपिलमा उल्लेख गर्नुभएको छ।
