काठमाडौं । स्वयम्भूस्थित यातायात कार्यालयमा कर तिर्नका लागि नागरिकले खेप्नुपरेको सास्तीलाई हामीले हिजो सचित्र प्रस्तुत गरेका थियौँ । त्यो समाचारपछि धेरै सेवाग्राहीले धन्यवाद त दिनु नै भयो । तर उहाँहरुको मुख्य चासो थियो– लौन कर तिर्ने कामलाई सजिलो बनाइदिनुपर्यो ।
राज्यलाई कर तिर्नकै लागि आइपर्ने यस्तो सास्तीले उनीहरुमा निराशा छाउनु स्वाभाविकै हो । सरकारले दिने सुविधा तथा सेवा नपाएर नागरिकले अकल्पनीय सास्ती भोग्नु त छँदैछ । महामारीको समयमा कतिको रोजीरोटी खोसिएको छ भने पैसा अभावका कारण घरमै आइसोलेसनमा बस्दा ज्यान गएका नागरिकहरु पनि कति छन् ।
जसै गरेपनि देशमा राजनीतिक स्थिरता नहुने अवस्था उनीहरुले देखेकै छन् । यस्तो अवस्थामा देशमा कतै सकारात्मक सञ्चारको अवस्था नभए पनि नागरिक कर तिर्न त लाइनमा बसेकै छन् ।
तर पनि उनले खेपेको सास्तीलाई हामीले नेपालमा सुशासनको ढुंगेयुग भनेका थियौँ । किनभने नागरिकले कुनै पनि सरकारी कार्यालयमा कर बुझाउनका लागि लाइन बस्न नसककेर बिहान उज्यालो हुँदैदेखि कार्यालय पुग्छ, उसले घन्टौँ लाइन बस्दा पनि पालो आउँदैन र चिसोले कठ्यांग्रिएर आफ्नो पालोको संकेतका लागि आफ्नो नाम लेखेको कागजलाई ढुंगाले च्यापेर चिया पिउन, खाना खान बाहिर निस्किन्छ ।
नेपालमा गणतन्त्रात्मक शासन व्यवस्था छ भनिएको छ । यसलाई प्रजातन्त्रभन्दा पनि राम्रो व्यवस्था भनेर भित्र्याइएको हो । जनताको छोरा नै राज्य तथा सरकार प्रमुख हुने भएकोले नै यो व्यवस्थालाई उत्तम मानिएको होला । तर व्यवहारमा त्यस्तो छैन, जनताले पाउने दुःखको पारो यो व्यवस्थाले कहिल्यै तल झार्न सकेको छैन ।
समाचार संकलनका लागि हामी त्यहाँ पुग्दा धनगढीकी शर्मिला विष्ट रुँदै भन्नुभयो– ढाडको समस्याले गर्दा दुई घन्टाभन्दा लामो लाइन बसेपछि उभिनै सक्दिन तर यहाँ चार पाँच घन्टा लाइन नबसी कामै हुदैन । त्यही पनि बलियाहरुले पछिबाट ठेल्छन् र बेलाबेलामा लाइन नै बिगारिदिन्छन् ।
हातमा पैसा, बैंकमा रकम बुझाएका भौचर बोकेका कैयौँ व्यक्ति छन् यहाँ शर्मिला जस्तै । तर सरकारलाई पैसा तिर्ने पालो कुरेको बर्षौँ भइसक्यो । बधुबार सो कार्यालयमा पालो कुर्न बस्नुभएका पोखराका महेन्द्र पालिखे मोटर साइकलको कर बुझाउन यहाँ धाउन थालेको तीन दिन भयो तर अझै काम भएको छैन ।
पेशाले शिक्षक उहाँ अहिले पनि विद्यालयको अनलाइन कक्षा लिने गर्नुहुन्छ । भन्नुहुन्छ– सोमबार र मंगलबार पहिलो पिरियड अर्कै साथीलाई लिन लगाएर यहाँ आएँ तर दुई घन्टा कुर्दा पनि पालो नआएर फर्किनुपर्यो । अब आज पनि के हुन्छ ठेगान छैन ।
उहाँले बुधबार पनि बिहान साढे आठ बजे आएर आफ्नो पालो कुर्नुभएको थियो । शनिबार विदा हुने दिन आफ्नो पनि विद्यालय विदा हुने तर अरु बार चाहिँ दुई चार घन्टा समय लिएर आउँदा कर बुझाउनै नपाउने उहाँको गुनासो छ ।
पालिखेले भन्नुभयो– अरु देशमा सरकारलाई कर तिर्नेको कत्रो ठूलो इज्जत छ । जनतालाई कसरी करको दायरामा ल्याउने, कर संकलनका लागि जनतालाई कसरी सजिलो नियम बनाउने र सुविधा दिने भन्ने विषयमा सरकारहरुले कति प्रभावकारी योजना बनाउँछन् । तर हामीकहाँ भने यस्तो जनतालाई नै यस्तो निरुत्साहित गरेपछि देश कसरी बन्छ ?
यो पनि पढ्नुहोस्ः देशमा सुशासनको ढुंगे युग !
https://www.newspolar.com/news/detail/155262/
