वीरगन्ज । अत्यधिक चिसो बढेको भन्दै वीरगन्जमा विद्यालय तीन दिनका लागि बन्द गरिएको छ । नेपाल शिक्षक महासंघ र प्राइभेट एन्ड बोर्डिङ स्कुल अर्गनाइजेसन नेपाल वीरगन्ज महानगरपालिकाले आइतबार संयुक्त विज्ञप्ति जारी गर्दै विद्यालय बन्द गरेका हुन् ।
महानगरपालिकाभित्रका सामुदायिक तथा संस्थागत विद्यालयहरुको पठनपाठन माघ ४ गतेदेखि ६ गतेसम्म स्थगित गर्ने सहमति भएको महासंघ वीरगन्ज अध्यक्ष विनोद मेहताले जानकारी दिनुभयो । बढ्दै गएको अत्यधिक चिसो मौसमका कारण बालबालिकाको स्वास्थ्यमा पर्नसक्ने प्रतिकूल असरको सम्भावनालाई मध्यनजर गरी विभिन्न विद्यालयका प्रधानाध्यापक, शिक्षक तथा अभिभावकहरुको परामर्श एवं वीरगन्ज महानगरपालिकासँगको अनौपचारिक छलफलबाट विद्यालयको पठनपाठन स्थगित गर्ने सहमति भएको प्याब्सन वीरगन्जका अध्यक्ष आलोककुमार चौरसियाले बताउनुभयो ।
वीरगन्ज महानगरपालिका शैक्षिक प्रशासन महाशाखा प्रमुख अरविन्दलाल कर्णले मौसम प्रतिकूल भएकाले विद्यालय बन्द गर्ने निर्णयमा पुगेको जनाउनुभयो ।कोरोना कहरका कारण लामो समय बन्द रहेका वीरगन्ज क्षेत्रका विद्यालयहरु गत महिनाबाट मात्रै सञ्चालनमा आएका थिए । नेपाल समाचारपत्र दैनिक
