काठमाडौँ । एसिसी प्रिमियर कपको सेमिफाइनलमा नेपालले युएईविरुद्ध प्रतिस्पर्धा गर्ने भएको छ ।
साबिक विजेता समेत रहेको नेपाल समूह ‘ए’को विजेता र युएई समूह ‘बी’को उपविजेताका रूपमा अन्तिम चारमा भिड्न लागेका हुन् ।
ओमानमा बुधबार भएको खेलमा नेपालले साउदी अरेबियालाई ६ विकेट हराउँदै समूह विजेता बनेको हो ।
नेपालसँग पराजित साउदी अरेबियाको सेमिफाइनल पुग्ने सपना अधुरै रह्यो । समूह ‘ए’मा साउदी अरेबियाको चार खेलबाट २ अंक रह्यो । नेपालविरुद्धको खेलमा जित निकाल्न सकेको खण्डमा साउदी अरेबियाले हङकङ र कतारसँग समान ४ अंक बनाउने थियो । रनरेटका आधारमा साउदी अरेबियाले अन्तिम चारमा पुग्ने मौका पाउने थियो ।
कतार र हङकङले चार खेलमा समान ४ अंक जोडे । तर, रनरेटमा पछि परेपछि कतार अन्तिम चारमा पुग्न सकेन । अब हङकङले समूह ‘बी’को विजेता ओमानसँग फाइनल प्रवेशका लागि प्रतिस्पर्धा गर्नेछ ।
समूह ‘ए’मा नेपाल अपराजित रह्यो । समूह ‘बी’मा ओमान पनि अपराजित रह्यो । युएईले ६ र कुवेतले ४ अंक जोडे ।
