काठमाडौँ । दोस्रो एकदिवसीय खेलमा आयरल्यान्ड ए सँग नेपाल ए ले नमिठो हार ब्यहोरेको छ । कीर्तिपुरस्थित टियु मैदानमा भर्खरै सम्पन्न खेलमा नेपाल ११४ रनले पराजित भएको हो ।
योसँगै तीन खेलको सिरिज आयरल्यान्ड ए ले एक खेल अगावै जित्न सफल भएको छ ।
१७५ रनको लक्ष्य पछ्याएको नेपाल ए १६.५ ओभरमा ६० रनमै अलआउट भयो । नेपालका भीम सार्कीले सर्वाधिक १७ रन बनाए । विनोद भण्डारीले १६ रन जोडे । नेपालका ९ खेलाडीले दोहोरो अंकमा रन बनाउन सकेनन् ।
आयरल्यान्डका म्याथ्यु हम्फ्रेजले ६ विकेट लिए । थोमस मेयर्स र फिन ह्यान्डले २–२ सफलता हात पारे । त्यसअघि टस हारेर पहिला ब्याटिङको निम्तो पाएको आयरल्यान्ड ३८.४ ओभरमा १७४ रनमा अलआउट भएको थियो ।
आयरल्यान्डका गाभिन होईले ५९ बलमा ५ चौका र २ छक्कासहित सर्वाधिक ५० रन बनाए । कप्तान निल रकले ४५ रन जोड्दा लियाम म्याकार्थीले ३५ रन जोडे । पिटर मुर १७ रनमा आउट भए ।
बलिङतर्फ नेपालका साहब आलम र रिजन ढकालले ३–३ विकेट लिए । यस्तै, मौसम ढकालले २ तथा कमलसिंह ऐरीले १ विकेट लिए ।
