काठमाडौँ। पाटनको गुइत टोलस्थित पुनर्निर्माण गरिएको ऐतिहासिक तथा सांस्कृतिक सम्पदा गुस्तल महाविहार र प्रथमश्री महाविहारको आगम आज संयुक्त रूपमा उद्घाटन गरिएको छ ।
प्रतिनिधिसभा सदस्य जगदीश खरेल, ललितपुर महानगरपालिकाका प्रमुख चिरीबाबु महर्जन तथा नेपालका लागि भारतीय राजदूत नवीन श्रीवास्तवले संयुक्त रूपमा उद्घाटन गर्नुभएको हो ।
कार्यक्रममा नेपाल सरकारअन्तर्गत सहरी विकास तथा भवन निर्माण विभागको केन्द्रीय आयोजना कार्यान्वयन एकाइ (भवन तथा आवास), स्थानीय समुदायका प्रतिनिधि तथा काठमाडौँस्थित भारतीय राजदूतावासका अधिकारीहरूको पनि सहभागिता थियो ।
भारत सरकारको भूकम्पपछिको पुनर्निर्माण अनुदान सहयोगअन्तर्गत करिब रु १२ करोड लागतमा उक्त सम्पदा पुनःस्थापना गरिएको हो । परियोजना नेपाल सरकारको केन्द्रीय आयोजना कार्यान्वयन एकाइ (भवन तथा आवास) मार्फत कार्यान्वयन गरिएको हो ।
प्रतिनिधिसभा सदस्य खरेलले स्थानीय समुदायको सक्रिय सहभागिताको प्रशंसा गर्दै गुस्तल महाविहारजस्ता प्राचीन जीवित सम्पदाको संरक्षण आवश्यक रहेको बताउनुभयो । उहाँले सांस्कृतिक सम्पदा पुनःस्थापनामा भारत सरकारले उपलब्ध गराएको सहयोगको पनि सराहना गर्नुभयो ।
नगरप्रमुख महर्जनले ललितपुरसहित नेपालका विभिन्न जिल्लामा सांस्कृतिक सम्पदाको पुनर्निर्माण तथा पुनस्र्थापनामा भारतले पुर्याएको योगदानको प्रशंसा गर्दै स्थानीय समुदायको सहकार्य पनि उल्लेखनीय रहेको बताउनुभयो ।
नेपालका लागि भारतीय राजदूत श्रीवास्तवले नेपाल र भारतबीचको गहिरो सांस्कृतिक सम्बन्धको चर्चा गर्दै नेपालका ऐतिहासिक सम्पदाको संरक्षणमा भारतले निरन्तर सहयोग गर्दै आएको बताउनुभयो । उहाँले पुनस्र्थापित संरचनाहरू दुई देशबीचको साझा सांस्कृतिक सम्पदा र मित्रताको दिगो प्रतीक भएको उल्लेख गर्नुभयो ।
भारत सरकारले भूकम्पपछिको पुनर्निर्माण सहयोगअन्तर्गत नेपालका आठ जिल्लाका ३० वटा सांस्कृतिक सम्पदा स्थलको संरक्षणमा सहयोग गरेको जनाएको छ । साथै गोरखा र नुवाकोटमा ५० हजार निजी आवास, आठ जिल्लामा ८५ शैक्षिक संस्था तथा ११ जिल्लामा १३३ स्वास्थ्य संरचनाको पुनर्निर्माणमा पनि सहयोग उपलब्ध गराएको जनाइएको छ ।
परियोजनाले भूकम्पपछिको पुनर्निर्माणमा नेपाल सरकारको प्रयासलाई थप सुदृढ बनाउनुका साथै नेपाल–भारतबीचको विकास साझेदारीलाई समेत प्रतिविम्बित गरेको बताइएको छ । रासस
