काठमाडौं । साताको अन्तिम कारोबार दिन बिहीबार नेप्से परिसूचक १६.११ अंकले घटेर २ हजार ५२६.९२ विन्दुमा बन्द भएको छ । यो दिन सेन्सेटिभ इन्डेक्स पनि १.६६ अंक घटेर ४६३.४७ विन्दुमा झरेको छ । 

नेप्से परिसूचकले समग्र धितोपत्र कारोबारको मापन गर्दछ भने सेन्सेटिभ इन्डेक्सले ठूला कम्पनीहरुको मात्र कारोबार मापन गर्दछ । २ हजार ५५२.३४ विन्दुदेखि खुलेको बजार २ हजार ५६५ विन्दुसम्म पुगेको थियो । साताको अन्तिम कारोबार दिन र बुधबार बढेको बजारबाट नाफा बुक गर्ने हावी हुँदा बजार प्रभावित बनेको हो ।

यसदिन २०६ वटा कम्पनीको ७२ हजार ७३७ पटकको व्यापारमा रू. ८ अर्ब ४१ करोड १७ लाख ३२ हजार बराबरको १ करोड ६० लाख ५८ हजार ४५८ कित्रा शेयर कारोबार भएको छ । बुधबारको तुलनामा नेप्से परिसूचक घटेपनि कारोबार रकम भने बढेको छ । बुधबार रू. ७ अर्ब ६४ करोड ९४ लाख ११ हजार बराबरको १ करोड ४९ लाख ६ हजार ७७ कित्ता शेयर कारोबार भएको थियो ।

यस दिन दोहोरो अंकले घटेको बजारमा चन्द्रागिरी हिल्स लिमिटेडको शेयरमूल्य सर्वाधिक बढेको छ । कम्पनीको शेयरमूल्य ५.०३ प्रतिशत अर्थात प्रतिकित्ता रू.९ ले बढेर अन्तिम मूल्य रू. १८८ पुगेको हो । बिहीबार विकास बैंक समूहको परिसूचक सर्वाधिक ०.७७ प्रतिशतले बढेको छ भने लघुवित्तको सर्वाधिक २.८८ प्रतिशतले घटेको छ । बिहीबार लाभांशकै कारण सपोर्ट लघुवित्तको शेयरमूल्य पनि सर्वाधिक १० प्रतिशत घटेको छ । यस वर्ष लाभांश नदिने सूचना बिहीबार सार्वजनिक भएसँगै उक्त कम्पनीको शेयरमा पनि विक्री चाप देखिएको थियो । यसदिन कम्पनीको शेयरमूल्य प्रतिकित्ता रू. २३५ ले घटेर अन्तिम मूल्य रू. २ हजार ११५ कायम भएको हो । 

यसदिन विकास बैंकसँगै बैंकिङ समूहको ०.६ प्रतिशत र म्युचुअल फण्डको ०.२२ प्रतिशत परिसूचक बढेको हो भने बाँकी समूहको घटेको छ । लघुवित्तसँगै व्यापारिकको १.३८ प्रतिशत, होटलको २.०१ प्रतिशत, जलविद्युतको १.३१ प्रतिशत, वित्तको १.५३ प्रतिशत, निर्जीवन बीमाको १.५६ प्रतिशत, उत्पादन तथा प्रशोधनको १.८५ प्रतिशत, अन्यको १.०७ प्रतिशत र जीवन बीमा समूहको १.१६ प्रतिशत परिसूचक घटेको हो ।

बिहीबार कारोबार रकममा सर्वाधिक हिस्सा डिप्रोक्स लघुवित्त वित्तीय संस्थाको भएको छ । उक्त कम्पनीको रू. ५६ करोड ६३ लाख २९ हजार बराबरको २ लाख ८० हजार ३२९ कित्ता शेयर कारोबार भएको हो । बिहीबार गत वर्षको भन्दा २५ प्रतिशत कम २० प्रतिशत लाभांश प्रस्ताव गरेको उक्त कम्पनीको शेयर विक्री चापका कारण मूल्य पनि घटेको छ । गत वर्ष ३० प्रतिशत बोनस शेयर र १५ प्रतिशत नगद लाभांश दिएको कम्पनीले यस वर्ष १५ प्रतिशत बोनस शेयर र ५ प्रतिशत नगद लाभांश दिने प्रस्ताव गरेको हो । कम लाभांशका कारण बिहीबार विक्री चाप हुँदा उक्त कम्पनीको शेयरमूल्य ९.९९ प्रतिशत घटेको छ । प्रतिकित्ता रू. २१९ ले घटेर कम्पनीको अन्तिम शेयरमूल्य रू. १ हजार ९७३ कायम भएको छ ।