काठमाडाैँ । बुटवल बसपार्कमा सञ्चालित नागरिक सहायता कक्षबाट प्रदान गरिएको सेवाबाट सर्वसाधारण यात्रु, सार्वजनिक सवारीसाधन सञ्चालक र सुरक्षाकर्मीलाई सहज भएको छ ।
बडादसैँको पूर्वसन्ध्यामा घर जानेको चहलपहल बढेसँगै यात्रुलाई सुरक्षित यात्रा गर्न सहयोग पु¥याउने, सम्भावित ठगी नियन्त्रण गर्ने र ट्राफिक नियमको पालना गराउने उद्देश्यले स्थापना भएको नागरिक सहायता कक्षबाट आवश्यक समन्यव तथा सहजीकरण भइरहेको छ ।
पश्चिम नेपाल बस व्यवसायी प्रालिका अध्यक्ष दधिराम खरेलले सवारीसाधनको गति सीमित राख्ने, अनावश्यक हर्न नबजाउने, सवारी चलाउँदा मोबाइल फोन प्रयोग नगर्ने तथा मादकपदार्थ सेवन गरेर सवारी नचलाउने विषयमा सवारी चालकलाई सम्झाउने काम भइरहेको बताउनुभयो ।
यसैगरी, यात्राका क्रममा समस्या परेका नागरिकलाई आवश्यक परामर्श र सहयोगसमेत उपलब्ध गराइने व्यवस्था मिलाएको छ । समुदाय–प्रहरी साझेदारी कार्यक्रमअन्तर्गत नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलका प्रमुख प्रहरी उपरीक्षक निशान थापाले पश्चिम नेपाल बस व्यवसायी प्रालि, बुटवल यातायात प्रालि, सिद्धार्थ, श्रीनगर, गुल्मी जिप तथा देउराली यातायातसँगको सहयोग र सहकार्यमा नागरिक सहायता कक्ष स्थापना गरेको जानकारी दिनुभयो ।
प्रहरी उपरीक्षक थापाले प्रहरी र समुदायबीचको समन्वय र सहकार्यबाट मात्र नागरिकलाई सहज र सुरक्षित सेवा प्रदान गर्न सकिने भएकाले सोहीअनुसार सहायता कक्ष स्थापना गरिएको स्पष्ट गर्नुभयो ।
यही असोज २५ गतेबाट सञ्चालनमा आएको चाडपर्व लक्षित सो सहायता कक्षबाट यात्रुको समस्या समाधान, सडक सुरक्षासम्बन्धी जानकारी र ट्राफिक नियम पालनाबारे सचेतना अभिवृद्धि गर्ने काम भइरहेको छ ।
पश्चिम नेपाल बस व्यवसायी प्रालिका अध्यक्ष खरेलले बुटवल बसपार्कको भौतिक तथा व्यवस्थापकीय सुधार अपेक्षाअनुसार हुन नसकेकको तथा उज्यालो र सफा बसपार्कतर्फ पर्याप्त ध्यान पुग्न नसकेकोतर्फ सम्बद्ध पक्षको ध्यान जाओस् भन्नुभयो ।
विशेषगरी बडादसैँको उपलक्ष्यमा सुरक्षित र सहज यात्रालाई प्राथमिकता दिँदै स्थापना गरिएको बुटवल बसपार्कस्थित नागरिक सहायता कक्षमा सम्पर्क गर्नेक्रम बढेको छ । अहिले बसपार्कमा काम गर्ने कर्मचारीका लागि परिचयपत्र अनिवार्य गरेको, टिकट काउन्टरबाट मात्रै टिकट खरिद गर्नुपर्ने भएको, सार्वजनिक सवारीसाधनले सिट क्षमताभन्दा बढी यात्रु राख्न नपाइने व्यवस्था गरेको र यात्रुलाई प्राथमिकता दिई उचित व्यवहारका साथ गन्तव्यस्थलमा पुर्याउन अनुरोध गरेको उहाँले बताउनुभयो ।
बुटवलबाट सङ्घीय राजधानी काठमाडौँसहित लुम्बिनी प्रदेशका सबै पहाडी जिल्ला, गण्डकी प्रदेशका बाग्लुङ, पर्वत, म्याग्दी, मनाङ, मुस्ताङ तथा मुलुकका अधिकांश सहरमा सार्वजनिक सवारीसाधन सञ्चालन हुनेगरेको अध्यक्ष खरेलले जानकारी दिनुभयो ।
