एजेन्सी । भारतीय क्रिकेटर रविचन्द्रन अश्विनले आईपीएल २०२४ को उद्घाटन खेलको टिकट पाएका छैनन् । सिजनको पहिलो खेल चेन्नई सुपर किंग्स र रोयल च्यालेन्जर्स बैंगलोरबीच मार्च २२ मा चेन्नईको एमए चिदम्बरम स्टेडियममा खेलिनेछ ।
अश्विन आफैं राजस्थान रोयल्सबाट खेल्छन् तर उनी आफ्ना छोराछोरीका लागि उद्घाटन खेलको टिकट खोजिरहेका छन् ।
अश्विनले टिकटका लागि सामाजिक सञ्जालमा सिएसके व्यवस्थापनलाई अपील गरेका छन् । अश्विनको परिवार चेन्नईमा बस्छ । उनले सामाजिक सञ्जाल पोस्टमा लेखेका छन् ‘यो खेलको टिकटको धेरै माग छ । मेरा बच्चाहरू उद्घाटन समारोह र खेल हेर्न चाहन्छन् ।’
आईपीएल टिकट सोमबारदेखि अनलाइन उपलब्ध हुनेछ । पहिलो खेलको टिकट सोमबार बिहान ८ बजेबाट उपलब्ध गराइएको छ । तर टिकट केही समयमै बिक्यो, अश्विनको परिवारले पनि एपबाट टिकट किन्न सकेनन् । त्यसपछि अश्विनले सीएसके व्यवस्थापनलाई अनुरोध गर्नुपर्यो ।
चेन्नईले पहिलो चरणको घोषित तालिका अनुसार चार खेल खेल्नुपर्नेछ । जसमा घरेलु मैदान चेपौकमा दुई खेल हुनेछन् । चेन्नईको चेपौकमा खेलाइने खेलका टिकट मात्रै नभएर अन्य स्थानमा सीएसकेले खेल्ने खेलका टिकट पनि बिक्री भइसकेका छन् ।
चेन्नई सुपर किंग्सको पहिलो खेल २२ मार्चमा रोयल च्यालेन्जर्स बैंग्लोर (आरसीबी)विरुद्ध चेन्नईमा नै खेलिने छ । दोस्रो खेल गुजरात टाइटन्ससँग मार्च २६ मा चेपौकमा हुनेछ । चेन्नईले आफ्नो तेस्रो खेल दिल्ली क्यापिटल्ससँग मार्च ३१ मा विशाखापट्टनममा र चौथो खेल अप्रिल ५ मा सनराजर्स हैदरावादसँग खेल्नुपर्नेछ ।
