काठमाडौँ । सत्तारुढ प्रमुख घटक नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले आफूलाई प्रधानमन्त्रीको इच्छा नभएको बताएका छन् । बुधबार प्रतिनिधिसभा बैठकमा प्रधानमन्त्री पुष्पकमल दाहाल ‘प्रचण्ड’ ले राखेको विश्वासको मतको प्रस्तावमाथि छलफलमा भाग लिँदै उनले यस्तो बताएका हुन् ।
यस्तै अध्यक्ष ओलीले प्रधानमन्त्री दाहाल, आफू र नेकपा एसका अध्यक्ष माधवकुमार नेपालबीच प्रधानमन्त्री पद १३/१३ महिनाका लागि बाँडफाँड गरेको समाचार आएकोमा आपत्ति समेत जनाए ।
उनले भने, ‘आज प्रधानमन्त्रीको कार्यकाल १३/१३ महिना बाँडेको कुरा बजार भरी देख्छु । यसले यो सरकार किन परिवर्तन भएको हो ? यसमा नेताहरू सहकार्य किन गरेको हो भन्ने कुराको गरिमालाई घटाएको छ यस्ता खबरहरूको अनुचित सम्प्रेषण । यो गलत कुरा हो । प्रधानमन्त्री हुनकै लागि हामीले यस्तो गरेको होइन । मलाई यो प्रधानमन्त्रीको इच्छा पनि छैन । ’
