काठमाडौँ । आईसीसी क्रिकेट विश्वकप लिग–२ अन्तर्गत नामिबियाले नेदरल्यान्ड्सलाई २०४ रनको लक्ष्य दिएको छ । कीर्तिपुरस्थित त्रिवि मैदानमा टस हारेर पहिले ब्याटिङ गरेको नामिबिया ४१.३ ओभरमा २०३ रनमा अलआउट भयो ।
मैदान गिलो भएका कारण खेल ४५ ओभरमा झारिएको थियो । नामिबियाका लागि जान निकोलले ४९ रन जोडे । यस्तै मालन क्रुगरले ३९ रन र जान फ्राइलिंकले ३४ रनको योगदान दिए ।
बलिङमा नेदरल्यान्ड्सका भिभियन किंग्माले ३ विकेट लिए भने आर्यन दत्त र भान मार्वीले २–२ सफलता हात पारे ।
नेपाल, नामिबिया र नेदरल्यान्ड्सबीचको यस सिरिजमा नेदरल्यान्ड्सले अघिल्लो खेलमा नामिबियालाई हराएको थियो । सिरिजमा आइतबार नेपाल र नेदरल्यान्ड्सबीच अन्तिम खेल हुनेछ।
