काठमाडौं । नेपाली कांग्रेसका केन्द्रीय सदस्य अजयबाबु शिवाकोटीले चुनावमा गठबन्धन नगर्ने प्रस्ताव प्रतिवेदनबाट हटाउन दबाब दिने कार्य आम कार्यकर्ताको भावना विपरीत भएको जनाउनु भएको छ ।
महासमिति बैठकमा आगामी निर्वाचनमा कुनैपनि दलसँग गठबन्धन नगर्ने महामन्त्री गगनकुमार थापाको प्रस्तावमा सभापति शेरबहादुर देउवाले असहमति जनाउदै प्रस्ताब हटाउन दवाब दिएपछि केन्द्रीय सदस्य शिवाकोटीले यस्तो कार्य आम कार्यकर्ताको भावना विपरीत भएको जनाउनु भएकाे हो ।
महामन्त्री थापाले तयार पारेको सांगठनिक प्रतिवेदनमा समेटिएका कतिपय विषयवस्तुमा सभापति देउवा असन्तुष्ट छन्। मुख्यगरी गठबन्धन, विधान लगायतका विषय प्रतिवेदनमा राखिएको भन्दै त्यसलाई हटाउन सभापति देउवाले निर्देशन दिएका छन्। तर, महामन्त्री थापा तयार नभएपछि सोमबार बिहानैदेखि छलफल समेत भएको छ ।
सभापतिको दवाब पछि शिवाकोटीले सामाजिक संञ्जालमा लेख्नु भएको –
प्रजातन्त्र दिवसको आम नेपालीमा शुभकामना, साथै आजबाट शुरु हुन लागेको नेपाली कांग्रेसको महासमिति वैठकमा आउनुहुने सबै अग्रज तथा साथीहरुलाई स्वागत गर्दछु। महासमिति वैठकमा पेस हुने प्रतिवेदनमा प्रस्तावित आउने चुनावदेखि कांग्रेसका शुभेच्छुकहरु र कार्यकर्ताले रुख चिन्हमै मत हाल्न पाउने व्यवस्थालाई पेचिलो बनाएर त्यसलाई प्रतिवेदनबाट हटाउन दबाब दिने कार्य आम कार्यकर्ता र शुभेच्छुकको भावना विपरित छ। आउनुस एकपटक फेरि कांग्रेसका शुभेच्छुकहरु र कार्यकर्तालाई रुख चिन्हमै मत हाल्न पाउने व्यवस्थाका लागि महासमितिमा आवाज बुलन्द गरौं। महासमिति वैठकलाई पूर्ण सफल पारौ। जय नेपाल।
