काठमाडौं । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले गत भदौ १० गतेको विनाशकारी बाढीबाट प्रभावित रसुवा, नुवाकोट र धादिङका तटीय क्षेत्रको स्थलगत निरीक्षण गर्नुभएको छ ।
बाढीले तटीय बस्ती, सडक, पुल, विद्युत् तथा खानेपानीका संरचनामा ठूलो क्षति पुर्याएको छ । बाढीपछि कतिपय बस्तीमा घर तथा भौतिक संरचनाका भग्नावशेष, लेदो र ठूला ढुंगा मात्रै बाँकी रहेका छन् ।
ओली धर्मपत्नी राधिका शाक्यसहित बाढी प्रभावित क्षेत्रमा पुगेर क्षतिको अवस्थाबारे जानकारी लिनुभएको हो । उहाँले बाढीपीडित स्थानीयसँग भेट गरी उनीहरूको अवस्था, समस्या र तत्काल आवश्यक सहयोगबारे जानकारी लिनुभएको थियो ।
स्थलगत निरीक्षणका क्रममा बाढीपीडितहरूले घर, सम्पत्ति र जीविकोपार्जनका साधन गुमाएको भन्दै तत्काल राहत तथा दीर्घकालीन पुनर्वासको व्यवस्था गर्न माग गरेका थिए । उनीहरूले अस्थायी आवास, खाद्यान्न, लत्ताकपडा तथा स्वास्थ्य उपचारको व्यवस्था तत्काल गर्नुपर्ने बताएका थिए ।
निरीक्षणपछि सञ्चारकर्मी तथा स्थानीय अगुवासँग कुरा गर्दै अध्यक्ष ओलीले विपत्तिलाई सामान्य बाढीका रूपमा मात्र लिन नहुने बताउनुभयो । उहाँले जलवायु संकट र नदी अतिक्रमणका कारण यस्ता विपद्को जोखिम बढिरहेको उल्लेख गर्दै प्रभावित बस्तीलाई पुनः त्यही जोखिमपूर्ण स्थानमा बसाउन नहुने धारणा राख्नुभयो ।
ओलीले भूगर्भविद् तथा प्राविधिकको अध्ययनका आधारमा सुरक्षित स्थान पहिचान गरी एकीकृत बस्ती निर्माण गर्नुपर्नेमा जोड दिनुभयो । उहाँले बाढीपीडितको आवाज संसद् र सरकारसमक्ष प्राथमिकताका साथ उठाउने प्रतिबद्धता समेत व्यक्त गर्नुभयो ।
बाढीपछि विस्थापित परिवारहरू अस्थायी आश्रयस्थलमा बसिरहेका छन् । वर्षायाम जारी रहँदा र चिसो मौसम नजिकिँदै गर्दा बालबालिका, वृद्धवृद्धा तथा अन्य प्रभावितको अवस्था थप कठिन बन्न सक्ने भएकाले तत्काल सुरक्षित आवास र दीर्घकालीन पुनर्वासको व्यवस्था गर्नुपर्ने माग बढेको छ ।
एमाले निकट स्वयंसेवकहरू समेत प्रभावित क्षेत्रमा परिचालित भएर भग्नावशेष हटाउने, अवरुद्ध सडक खुलाउने तथा राहत सामग्री वितरणमा सहयोग गरिरहेका छन् । अध्यक्ष ओलीको निरीक्षणले बाढी प्रभावित क्षेत्रको पुनर्स्थापना र पुनर्निर्माणको विषयलाई थप प्राथमिकतामा ल्याउने अपेक्षा गरिएको छ ।
