काठमाडौँ । प्रधानमन्त्री कप महिला राष्ट्रिय टी–२० क्रिकेट प्रतियोगितामा मधेश प्रदेशले लुम्बिनी प्रदेशलाई आठ विकेटले पराजित गरेको छ । प्रतियोगितामा ६ खेल खेलेको मधेश प्रदेशको यो दोस्रो जित हो ।
लुम्बिनीले जितको लागि दिएको ९७ रनको सामान्य लक्ष्य मधेश प्रदेशले भने १८.५ ओभरमा दुई विकेट गुमाएर पुरा गर्यो ।
मधेशको जितमा ओपनर पूजा महतोले अविजित ६० रनको योगदान गरिन् । अनुराधा चौधरीले १७ र सरस्वती कुमारीले अविजित १२ रन बनाइन् ।
लुम्बिनीको लागि कमला जीएम र सुस्मिता भुषालले एक–एक विकेट लिए ।
काठमाडौँको मुलपानी क्रिकेट मैदानमा टस जितेर पहिला ब्याटिङ रोजेको लुम्बिनीले निर्धारित २० ओभरमा सात विकेट गुमाएर ९६ रन बनाएको थियो । लुम्बिनीका लागि ओपनर लक्ष्मी चौधरीले अविजिति ६४ रन बनाएकी थिइन् । कप्तान सरस्वती जीएमले १० रन बनाईन्।
मधेश प्रदेशको लागि साक्षी यादवले दुई विकेट लिएकी थिईन् । यस्तै, पूजा महतो, आरती महतो र कविता गौतमले समान एक–एक विकेट लिए ।
