काठमाडौँ । नेकपा एमालेका अध्यक्ष केपी शर्मा ओलीले वर्तमान सत्ता गठबन्धन तोड्ने बताएका छन् ।
‘झुलाघाट–चिवा भञ्ज्याङ सम्मृद्धिका लागि सङ्कल्प यात्रा’अन्तर्गत शुक्रवार तेह्रथुमको म्याङ्लुङमा आयोजित कार्यक्रममा बोल्दै ओलीले वर्तमान सरकार वैधानिक तरिकाले तोड्ने बताएका हुन् ।
देशको प्रगतिका बाधक बनेका गठबन्धनका अपराधहरूलाई वैधानिक ढङ्गले जनताको अभिमतबाट परास्त गर्ने बताउदै उनले भने,
‘लोकतन्त्रमा धैर्यता राखेर लोकतान्त्रिक विधिबाटै समस्या समाधान खोज्नुपर्छ । अहिले हामी सरकारमा छैनौ, हामीलाई देशी विदेशी षडयन्त्रहरू लागेर सरकारबाट हटाइयो । हामीले सुशासन ल्याउने काम गर्यौ, त्यसकारण हामीलाई हटाइयो । हामी फेरि पनि धैर्यतापूर्ण ढङ्गले अहिलेको गठबन्धन तोड्छौ ।’
नेकपा एमाले बलिदान, जेलनेल भोगेर आएको भन्दै उनले यस पार्टीलाई जनताले अलमलमा नपरी साथ दिनुपर्ने बताए । ‘हतार गर्नु पनि हुँदैन । यो देश बनाउने कुरा हो । त्यही भएर हामीले मिसन २०८४ भनेका छौ । देश विकास गर्दै पुस्तौ पुस्ता अगाडि जाने हो ।’, ओलीले भने, ‘यो पार्टी मात्रै देशमा समृद्धि ल्याउन सक्छ, देश विकास गर्न सक्छ, जनताले विकासको बाटो देखाउन र सहयोगी भौतिक सामाजिक पूर्वाधार तयार गर्छ’।
