काठमाडौँ । त्रिकोणात्मक टि–२० अन्तर्राष्टिय सिरिजअन्तर्गत नेपालले युएईलाई पाँच विकेटले पराजित गरेको छ । जितको लागि युएईले दिएको एक सय ६५ रनको मध्यम लक्ष्य नेपालले १९.२ ओभरमा पाँच विकेटको क्षतिमा पूरा गर्यो । नेपालको लाागि दिपेन्द्र सिंह ऐरीले बिस्फोटक ईनिङ खेले । उनले १५ बलमा ६ चौका र एक छक्का प्रहार गर्दै ४० रनमा अविजित रहे ।
यस्तै, ओपनर आसिफ शेखले अर्धशतक बनाए । उनले ५० बलमा ६ चौका र २ छक्का प्रहार गर्दै ६२ रनको योगदान दिए । कुनैसमय २.१ ओभरमा ११/३ को स्थितीमा रहेको नेपाललाई आसिफ र कप्तान रोहित पौडेलले ९९ रनको साझेदारी गरे । रोहित ४२ बलमा ४ चौका र एक छक्का प्रहार गर्दै ४७ रन बनाएर आउट भए । नेपालले सुरुवाती ३ ओभरमै ओपनर कुशल भुर्तेल, सोमपाल कामी र कुशल मल्लको साथ गुमाएको थियो ।
त्यसअघि टस हारेर पहिला ब्याटिङको निम्तो पाएको यूएईले २० ओभरमा ७ विकेट गुमाउँदै १ सय ६४ रन जोडेको थियो । यूएईका लागि बसिल हमिद र वृत्य अरविन्दले ४५(४५ रनको योगदान दिए ।यस्तै, आसिफ खानले १८ रन बनाउदा खालिद शाहले १२ रन बनाएका थिए ।
नेपालको लागि सोमपाल कामि र अविनाश बोहराले समान दुई विकेट लिएका थिए । यस्तै, करण केसी र गुल्सन झाले समान एक एक विकेट लिए ।
नेपाल यसअघि नै फाईनलमा पुगिसकेको छ । अब सिरिजको फाइनल शुक्रबार टियु अन्तर्राष्ट्रिय क्रिकेट मैदानमा हुनेछ । त्यसअघि बुधबार यूएई र हङकङले प्रतिस्पर्धा गर्नेछन् । नेपालको ४ खेलमा ८ अंक हुँदा यूएईको ३ खेलमा २ अंक छ । हङकङ अंकविहिन छ ।
