काठमाडौँ । अखिल नेपाल फुटबल संघ (एन्फा)का अध्यक्ष पंकजविक्रम नेम्वाङविरुद्ध अविश्वासको प्रस्ताव दर्ता भएको छ ।
इतिहासमै पहिलो पटक एन्फा अध्यक्षविरुद्ध अविश्वासको प्रस्ताव दर्ता भएको हो । एन्फा पूर्वअध्यक्ष कर्माछिरिङ शेर्पाको नेतृत्वमा ४७ सदस्यको हस्ताक्षरसहित अध्यक्ष नेम्वाङ र महासचिव किरण राईविरुद्ध अविश्वासको दर्ता गरिएको छ ।
असन्तुष्ट पक्षले अध्यक्ष नेम्वाङ र महासचिव राईको बर्खास्तीको माग समेत गरेका छन् । ‘निर्वाचित भएको एक वर्षभन्दा बढीको अवधिमा वर्तमान एन्फा अध्यक्ष र महासचिवले पटकपटक एन्फा विधान र शुसासनको बर्खिलाप हुने गम्भीर कार्यहरु गर्दै आउनुभएको छ । अतः निज व्यक्तिलाई बहाल रहेको पदबाट बर्खास्त गर्न आवश्यक रहेकाले विधानले प्रद्दत्त गरेको अधिकार प्रयो गरी निवेदन प्रस्तुत गरेका छौँ ।’ निवेदनमा भनिएको छ ।
पूर्वअध्यक्ष कर्माछिरिङ शेर्पाले अविश्वासको प्रस्ताव दर्ता हुनासाथ अध्यक्ष स्वतः निलम्बनमा परेको भन्दै अब ३० दिनभित्र विशेष साधारणसभा बोलाएर भोटिङ गर्नुपर्ने बताएका छन् ।
असन्तुष्ट पक्षहरूले १९ वटा आरोपसहित अध्यक्षविरुद्ध अविश्वास प्रस्ताव दर्ता गराएका हुन् ।
यसैबीच, एन्फाको सोमबारका लागि निर्धारित विशेष साधारणसभा स्थगित गरिएको छ । ललितपुरको सातदोबाटोस्थित एन्फा मुख्यालयमा विशेष साधारणसभा हुने तय थियो ।
एन्फाका सदस्य संस्थाहरूको विशेष सल्लाहमा अध्यक्षले विशेष साधारणसभा स्थगित गरेको एन्फाले जनाएको छ ।
यसअघि, एन्फाको विशेष साधारणसभा आइतबारका लागि निर्धारित भएपनि गणपूरक संख्या अपुग भएकाले उक्त बैठक स्थगित गर्दै सोमबारका लागि तय गरिएको थियो ।
[pdf-embedder url=”https://newspolar.com/wp-content/uploads/2023/09/anfa.pdf”]
