काठमाडौँ । काठमाडौं महानगरपालिकाले छात्रवृत्ति परीक्षामा गलत विवरण पेस गरे परीक्षा र भर्ना रद्द गर्ने भएको छ । कामपाको शिक्षा शाखाले कक्षा ११ मा अध्ययन गर्ने नयाँ विद्यार्थीलाई छात्रवृत्ति उपलब्ध गराउन एकीकृत परीक्षा सञ्चालन गर्न लागेको हो ।
साउन २० गते हुने परीक्षाको लागि विद्यार्थीले गलत विवरण पेस गरी झुठो ठहरिए आवेदन फारम रद्द गरिनुका साथै भर्नासमेत रद्द गरी शैक्षिक कार्यक्रमबाट निष्कासन गर्ने निर्णय गरेको छ । छात्रवृत्ति परीक्षाको लागि फारम भर्दादेखि परीक्षा दिँदासमेत परीक्षाको महत्वलाई ख्याल गर्नुपर्नेमा कामपा शिक्षा शाखा प्रमुख सीताराम कोइरालाले जोड दिनुभयो ।
कामपाले संस्थागत विद्यालयमा भर्ना भएका जम्मा विद्यार्थीमा १० प्रतिशत छात्रवृत्ति दिन परीक्षा लिन लागेको छ । यसअघि भनसुनको आधारमा मनपरी रूपमा छात्रवृत्ति दिने प्रचलन रहेकोमा कमपाले सो प्रचलन खारेज गरी प्रभावकारी ढंगले सञ्चालन गर्न नयाँ प्रणाली शुरू गरेको हो ।
महानगरले छात्रवृत्ति छनोट व्यवस्थाअनुसार संस्थागत विद्यालयले उपलब्ध गराउने १० प्रतिशत छात्रवृत्तिलाई सत्प्रतिशत मानेर निर्णय गरेको छ । जसअनुसार सामुदायिक विद्यालयमा अध्ययन गरेका विद्यार्थीका लागि ४०, संस्थागत विद्यालयबाट छात्रवृत्तिमा अध्ययन गरेकालाई ५, महानगरमा स्थानिय बासिन्दालाई ९ र ल्यान्डफिल साइट प्रभावितक्षेत्रमा बसोबास भई सोही क्षेत्रको विद्यालयमा अध्ययनरत विद्यार्थीको लागि १ प्रतिशत छात्रवृत्ति छुट्याएको छ ।
यस्तै महानगरले बाँकि ४५ प्रतिशत छात्रवृत्तिमध्ये छात्रालाई ३३, खस आर्यलाई १७, आदिवासी/जनजातिलाई १५, मधेसीलाई १२, दलितलाई ९, थारू र पिछडिएका क्षेत्रका व्यक्तिलाई गरी ४/४, मुस्लिम र थारूलाई २/२ र सहिद र बेपत्ता परिएका नागरिक र द्वन्द्वपीडित नागरिकका परिवारलाई २ प्रतिशत छात्रवृत्ति उपलब्ध गराउने भएको छ ।
पिछडिएको क्षेत्रका व्यक्तिका रूपमा अछाम, कालीकोट, जाजरकोट, जुम्ला, डोल्पा, बझाङ, बाजुरा, मुगु र हुम्ला जिल्लामा स्थायी बसोबास गरिरहेका विद्यार्थीलाई मानिने महानगरले जनाएको छ । नेपाल समाचारपत्र
