काठमाडौं । शिक्षा तथा खेलकुद मन्त्रालयले शैक्षिक परामर्श सेवा तथा भाषा शिक्षणसम्बन्धी निर्देशिका, २०७३ खारेज गरेको छ। मन्त्रालयको शैक्षिक परामर्श तथा प्रमाणीकरण शाखाले मंगलबार सूचना जारी गर्दै उक्त जानकारी दिएको हो।
मन्त्रालयका अनुसार नेपाल सरकारबाट स्वीकृत शैक्षिक परामर्श, भाषा शिक्षण तथा तयारी कक्षा (सञ्चालन र व्यवस्थापन) नियमावली, २०८३ मिति २०८३ असार २५ गते राजपत्रमा प्रकाशित भई कार्यान्वयनमा आइसकेकाले कार्यान्वयनमा कुनै द्विविधा नहोस् भन्ने उद्देश्यले पुरानो निर्देशिका खारेज गरिएको हो।
मन्त्रालयले मिति २०८३ साउन १८ गतेको मन्त्रीस्तरीय निर्णयबाट शैक्षिक परामर्श सेवा तथा भाषा शिक्षणसम्बन्धी निर्देशिका, २०७३ खारेज गरिएको जानकारी दिँदै सम्बन्धित सबै निकाय तथा सरोकारवालालाई नयाँ नियमावलीअनुसार कार्य गर्न आग्रह गरेको छ।
